لاہور، وزیراعلیٰ پنجاب مریم نواز شریف کا کہنا ہے کہ پنجاب سیاحوں کے استقبال کے لیے مکمل طور پر تیار ہے، ای سی او کے معزز مہمانوں کی موجودگی ہمارے لیے باعث فخر ہے۔
وزیراعلیٰ سے اکنامک کوآپریشن آرگنائزیشن (ای سی او) کے 25 رکنی وفد نے ملاقات کی، جس میں تاجکستان، ازبکستان، ترکیہ، ایران اور پاکستان کے مستقل مندوبین شامل تھے۔ وفد کی قیادت ای سی او کے سیکرٹری جنرل اسد مجید خان نے کی۔
مریم نواز نے مہمانوں کا پرتپاک خیرمقدم کرتے ہوئے لاہور آمد کو خوش آئند قرار دیا، اس موقع پر سینئر وزیر مریم اورنگزیب نے وفد کو تفصیلی بریفنگ دی، جبکہ وزیراعلیٰ نے لاہور کو ای سی او کیپٹل قرار دینے میں ترکمانستان کی حمایت پر شکریہ ادا کیا۔
گفتگو کے دوران مریم نواز کا کہنا تھا کہ لاہور صرف ایک شہر نہیں بلکہ زندہ تاریخ کا نمائندہ ہے، یہاں کی گلیوں سے تہذیب کی خوشبو آتی ہے اور آثار قدیمہ ماضی کی شاندار تاریخ کے گواہ ہیں، انہوں نے کہا کہ لاہوریوں کی مہمان نوازی بے مثال ہے، یہاں کے باغات، شاہی قلعے اور یونیسکو ورلڈ ہیریٹیج سائٹس شہر کی عظمت کی علامت ہیں۔
وزیراعلیٰ کا کہنا تھا کہ حکومت پنجاب سیاحت کے شعبے کو ایک مکمل صنعت کے طور پر فروغ دینے کے لیے پرعزم ہے۔ نہ صرف لاہور بلکہ پورے صوبے میں سیاحتی مقامات کو جدید سہولیات سے آراستہ کیا جا رہا ہے، ملکی و غیر ملکی سیاحوں کے لیے آسانیاں پیدا کی جا رہی ہیں۔
انہوں نے کہا کہ پنجاب تیزی سے کاروبار، ٹیکنالوجی اور خدمات کا مرکز بنتا جا رہا ہے، زراعت، تعلیم، انڈسٹری، ٹورازم اور دیگر شعبوں میں سرمایہ کاری کے وسیع مواقع موجود ہیں، غیر ملکی سرمایہ کاروں کے لیے سازگار ماحول فراہم کیا جا چکا ہے۔
اس موقع پر ای سی او کے سیکرٹری جنرل اسد مجید خان نے کہا کہ پاکستان 1992 میں سابق وزیراعظم نواز شریف کی قیادت میں ای سی او میں شامل ہوا، وزیراعظم، وزیراعلیٰ اور خود ان کا لاہور سے ہونا ایک خوش آئند اتفاق ہے۔
وفد نے لاہور کی خوبصورتی، ثقافتی ورثے کی بحالی اور سیاحت کے فروغ میں مریم نواز اور ان کی ٹیم کی کاوشوں کو سراہا، اور انہیں یادگاری تحائف پیش کیے۔
