کرم، فریقین کے درمیان جنگ بندی معاہدے کے باوجود جھڑپوں میں مزید 5 افراد جان کی بازی ہار گئے اور 9 زخمی ہو گئے ہیں۔
چند روز پہلے کرم میں فریقین کے درمیان جنگ بندی کا معاہدہ طے پایا تھا تاہم اس کے باوجود 8 روز سے جھڑپوں کا سلسلہ وقفے وقفے سے تاحال جاری ہے۔
پولیس کا کہنا ہے کہ تازہ جھڑپوں میں مزید 5 افراد اپنی جانیں گنوا بیٹھے ہیں جبکہ 9 شدید زخمی ہیں، جھڑپوں میں اب تک 55 افراد جاں بحق اور 149 سے زائد زخمی ہو چکے ہیں۔
پولیس کے مطابق 21 نومبر کو مسافر گاڑیوں پر حملے میں 52 افراد جاں بحق ہوگئے تھے۔
ضلعی انتظامیہ کا کہنا ہے کہ پشاور پاراچنار مرکزی شاہراہ 8 روز سے بند ہے جبکہ ڈپٹی کمشنر کرم جاوید اللہ کے مطابق مرکزی شاہراہ بند ہونے سے افغانستان کے ساتھ خرلاچی بارڈر پر تجارت بھی بند ہے۔
حالات کشیدہ ہونے کی وجہ سے انٹرنیٹ اور موبائل فون سروس بھی معطل ہے جسکے سبب عوام کو شدید مشکلات کا سامنا ہے۔
ڈپٹی کمشنر جاویداللہ کے مطابق فائر بندی اور جھڑپیں رکوانے کے لیے اقدامات کیے جا رہے ہیں، ہنگو، اورکزئی اور کوہاٹ سے مشران کا جرگہ مذاکرات کے لیے پاراچنار پہنچ رہا ہے، فریقین فائر بندی پر راضی ہیں، فائر بندی پر مکمل عملدرآمد کی کوششیں جاری ہیں۔
دوسری جانب گزشتہ روز وزیر اعلیٰ کے پی علی امین گنڈا پور کی زیر صدارت اجلاس میں بھی کرم میں کشیدہ صورتحال پر تبادلہ خیال کیا گیا اور انہیں فریقین کے درمیان جنگ بندی کی کوشش سے متعلق بریف کیا گیا۔
