قومی اسمبلی کا اجلاس شروع ہونے کے آدھے گھنٹے کے بعد کورم پورا نہ ہونے کے باعث ملتوی کردیا گیا۔
اسپیکر قومی اسمبلی سردار ایاز صادق کی زیر صدارت قومی اسمبلی کا اجلاس شروع ہوا تاہم آدھے گھنٹے کے بعد ہی ملتوی کردیا گیا، اجلاس پاکستان تحریک انصاف کے رکن اقبال آفریدی کی کورم پورا نہ ہونے کی نشاندھی کے بعد پیر 14 اپریل 2025 سہ پہر 4 بجے تک ملتوی کردیا گیا۔
اپوزیشن رکن صاحبزادہ حامد رضا نے کہا کہ آج کے اجلاس میں فلسطین کے مسئلے پر بات ہونا تھی، انہوں نے اپنی ہی جماعت کے رکن کو کورم پورا نہ ہونے کی نشاندہی سے روکنے کی کوشش بھی کی۔
اس موقع پر اسپیکر قومی اسمبلی سردار ایاز صادق نے کہا کہ پیپلز پارٹی نے 7 اپریل کو نہروں کے معاملے پر قرارداد جمع کرائی تھی جس پر ایوان میں متعدد ارکان نے اظہارِ خیال کیا تاہم اپوزیشن نے واک آؤٹ کر دیا، سپیکر کے مطابق جے یو آئی واک آؤٹ کا حصہ نہیں بنی۔
انہوں نے مزید کہا کہ آپ لوگ ایوان کو چلنے نہیں دیتے کل بھی کورم کی نشاندہی کی گئی اور آج بھی کورم پورا نہ ہونے کی وجہ سے اجلاس پیر تک ملتوی کردیا گیا ہے۔
