کراچی، اینٹی نارکوٹکس فورس (اے این ایف) نے مختلف کارروائیوں میں 8 کروڑ سے زائد مالیت کی منشیات برآمد کرتے ہوئے 3 افراد کو گرفتار کر لیا۔
ملک کے مختلف شہروں میں منشیات کی اسمگلنگ کے خلاف اے این ایف کی کارروائیاں جاری ہیں۔
ترجمان اے این ایف کے مطابق سات مختلف کارروائیوں میں 208.643 کلو گرام منشیات ضبط کی گئی، جن کی مالیت 8 کروڑ 72 لاکھ روپے سے زائد ہے، جبکہ 3 ملزمان کو حراست میں لے لیا گیا ہے۔
حکام کے مطابق کراچی پورٹ سے دبئی بھیجے جانے والے سامان میں موجود مصالحے کے پیکٹس سے 164.160 کلو گرام آئس برآمد ہوئی۔
کوئٹہ میں کوریئر آفس سے آسٹریلیا بھیجے جانے والے پارسل میں 5 کتابوں میں جذب شدہ 4.6 کلو گرام آئس ملی، جبکہ راولپنڈی کے کوریئر آفس میں برطانیہ جانے والے پارسل سے 1 کلو ہیروئن پکڑی گئی۔
ترجمان کے مطابق پشاور ایئرپورٹ پر جدہ جانے والے مسافر کے سامان میں چھپائی گئی 1.887 کلو آئس برآمد کی گئی۔ راولپنڈی کے ایک اور کوریئر آفس سے دوحہ بھیجے جانے والے پارسل میں موجود 2 کمپیوٹر ٹیبل میں چھپائی گئی 996 گرام آئس بھی ضبط کر لی گئی۔
مزید کارروائیوں میں لاہور کے ملتان روڈ پر ایک بس ٹرمینل کے قریب مسافر کے ٹرالی بیگ سے 30 کلو چرس برآمد ہوئی، جبکہ حیدرآباد کے قریب جامشورو میں بس میں سوار ملزم کے قبضے سے 5 کلو چرس اور 1 کلو آئس ضبط کی گئی۔
ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تفتیش شروع کر دی گئی ہے۔
