لاہور، عیدالفطر اپنے عزیزوں کے ساتھ منانے کے بعد پردیسیوں نے اپنے آبائی علاقوں سے واپسی کا سفر شروع کر دیا، جس کے نتیجے میں بس اڈوں اور ریلوے اسٹیشنوں پر مسافروں کا ہجوم بڑھ گیا۔
ملک کے مختلف شہروں سے آنے والے پردیسی اپنوں سے جدائی کے احساس اور اداسی لیے واپس لاہور پہنچ رہے ہیں۔ عید کی چھٹیاں اپنے پیاروں کے ساتھ گزارنے کے بعد بڑی تعداد میں لوگ دوبارہ روزگار اور ذمہ داریوں کی طرف لوٹ رہے ہیں۔
مسافروں کے رش کے باعث شہر کے بس اڈوں اور ریلوے اسٹیشنوں پر خاصا ہجوم نظر آ رہا ہے۔
واپسی پر پردیسیوں کا کہنا تھا کہ عید کی خوشگوار لمحات تیزی سے گزر گئے، روزگار کی خاطر اپنوں سے دوری اختیار کرنا مشکل ہوتا ہے، لیکن عید پر اہل خانہ کے ساتھ وقت گزارنے کا بھرپور لطف اٹھایا، اب دوبارہ کام کا آغاز کرنے کا وقت ہے۔
واضح رہے کہ حکومت نے 31 مارچ سے 2 اپریل تک عید کی سرکاری چھٹیوں کا اعلان کیا تھا، جبکہ سرکاری ملازمین نے ہفتہ اور اتوار کو ملا کر کل پانچ دن کی تعطیلات سے لطف اٹھایا، آج 3 اپریل سے سرکاری دفاتر اور کاروباری سرگرمیاں معمول کے مطابق بحال ہو چکی ہیں۔
