میانمار اور تھائی لینڈ میں آنے والے شدید زلزلے کے نتیجے میں ہلاکتوں کی تعداد 1000 سے بڑھ گئی۔
غیر ملکی خبر رساں ایجنسی کے مطابق، سرکاری اعداد و شمار کے مطابق میانمار میں زلزلے کے باعث 1002 افراد جاں بحق اور 2400 سے زائد زخمی ہو چکے ہیں۔
امدادی ٹیمیں ملبے تلے دبے افراد کو نکالنے میں مصروف ہیں، جبکہ امریکی ایجنسی نے اس زلزلے میں 10 ہزار سے زیادہ اموات کا خدشہ ظاہر کیا ہے۔
غیر ملکی میڈیا رپورٹس کے مطابق، میانمار کے دوسرے بڑے شہر منڈالے میں آنے والے زلزلے کی شدت اتنی زیادہ تھی کہ اس کے جھٹکے 900 کلومیٹر دور تھائی لینڈ کے دارالحکومت بینکاک تک محسوس کیے گئے، جہاں کئی عمارتیں اور تعمیراتی ڈھانچے گر گئے۔
اس کے علاوہ زلزلے کے اثرات بھارتی ریاستوں میگھالیہ اور منی پور، بنگلہ دیش کے دارالحکومت ڈھاکہ اور چین کے کچھ علاقوں میں بھی محسوس کیے گئے۔
دوسری طرف، بینکاک کے حکام نے بتایا کہ انہیں 2000 سے زائد عمارتوں میں دراڑیں پڑنے کی اطلاعات موصول ہوئیں، ایک زیر تعمیر بلند عمارت گرنے کے باعث 10 افراد جاں بحق جبکہ 100 مزدور لاپتہ ہیں۔
یاد رہے کہ گزشتہ روز میانمار اور تھائی لینڈ میں شدید زلزلہ آیا تھا۔ امریکی جیولوجیکل سروے کے مطابق، زلزلے کی شدت 7.7 اور گہرائی 10 کلومیٹر تھی، جبکہ اس کا مرکز میانمار کے شہر منڈالے سے 17.2 کلومیٹر دور واقع تھا۔
