اسلام آباد، انسداد دہشت گردی عدالت نے 26 نومبر احتجاج سے متعلق کیسز میں پی ٹی آئی کے متعدد رہنماؤں کی ضمانت میں 5 مئی تک توسیع کر دی۔
انسداد دہشت گردی عدالت اسلام آباد کے جج ابوالحسنات محمد ذوالقرنین نے 26 نومبر کے احتجاج پر درج مقدمات میں پی ٹی آئی رہنماؤں کی قبل از گرفتاری ضمانت کی درخواستوں پر سماعت کی۔
سماعت کے دوران شہریار آفریدی، شیر افضل مروت، عبدالقیوم نیازی، رؤف حسن، مشعال یوسفزئی، نادیہ خٹک اور فلک ناز چترالی عدالت میں پیش ہوئے، جبکہ عدالت نے شعیب شاہین، علی بخاری، عمیر نیازی، تیمور جھگڑا، علی زمان، عبدالطیف اور دیگر کی ضمانتوں میں توسیع کر دی۔
اس موقع پر پی ٹی آئی رہنما زرتاج گل، عالیہ حمزہ اور کنول شوزب کی جانب سے حاضری سے استثنیٰ کی درخواستیں دائر کی گئیں۔
عدالت نے ریمارکس دیے کہ تمام ضمانت کی درخواستوں کو اکٹھا سنا جائے گا، جس کے بعد عدالت نے پی ٹی آئی رہنماؤں کی ضمانت میں توسیع کرتے ہوئے سماعت 5 مئی تک ملتوی کر دی۔
یاد رہے کہ پی ٹی آئی رہنماؤں کے خلاف تھانہ رمنا، سیکرٹریٹ، ترنول اور کوہسار میں 26 نومبر کے احتجاج کے مقدمات درج ہیں۔
