اسلام آباد، سوشل میڈیا پر منفی پروپیگنڈے کے معاملے میں مشترکہ تحقیقاتی ٹیم (جے آئی ٹی) نے تحریک انصاف کے 16 ارکان کو دوبارہ طلب کر لیا۔
ذرائع کے مطابق پی ٹی آئی کے ان 16 افراد کو 18 مارچ کو جے آئی ٹی کے سامنے پیش ہونے کے نوٹس جاری کیے گئے ہیں۔
ذرائع کا کہنا ہے کہ فردوس شمیم نقوی، خالد خورشید، میاں اسلم اقبال، حماد اظہر، عون عباس، شہباز شبیر، وقاص اکرم اور تیمور سلیم کو جے آئی ٹی میں پیش ہونے کی ہدایت دی گئی ہے۔
مزید برآں، صبغت اللہ ورک، اظہر مشوانی، نعمان افضل، جبران الیاس، سلمان رضا، ذلفی بخاری، موسیٰ ورک اور علی ملک کو بھی دوبارہ طلب کیا گیا ہے۔
ذرائع کے مطابق پی ٹی آئی کے بیرسٹر گوہر، رؤف حسن اور شاہ فرمان پہلے ہی جے آئی ٹی کے سامنے پیش ہوچکے ہیں، جبکہ علیمہ خان کو 19 مارچ کو طلب کیا گیا ہے۔
ذرائع کا کہنا ہے کہ بانی پی ٹی آئی کی بہن علیمہ خان 14 مارچ کو طلبی کے باوجود پیش نہیں ہوئیں۔
ذرائع کے مطابق پی ٹی آئی ارکان کے خلاف ریاست مخالف پروپیگنڈے کے حوالے سے تحقیقات جاری ہیں۔
ذرائع کا کہنا ہے کہ الیکٹرانک جرائم کی روک تھام کے ایکٹ 2016 کے سیکشن 30 کے تحت یہ جے آئی ٹی تشکیل دی گئی تھی، جو انسپکٹر جنرل پولیس اسلام آباد کی سربراہی میں کام کر رہی ہے۔
