ڈینگی کی روک تھام کے لیے ڈسٹرکٹ ایمرجنسی رسپانس کمیٹی کا اجلاس ڈپٹی کمشنر گجرات صفدر حسین ورک کی زیر صدارت منعقد ہوا۔
گجرات: ڈینگی کی روک تھام کے لیے ڈسٹرکٹ ایمرجنسی رسپانس کمیٹی کا اجلاس ڈپٹی کمشنر گجرات صفدر حسین ورک کی زیر صدارت منعقد ہوا، جس میں ڈینگی کے انسداد کے لیے کیے جانے والے اقدامات کا جائزہ لیا گیا۔ اجلاس میں سی ای او ہیلتھ ڈاکٹر ذاکر علی رانا سمیت محکمہ صحت، میونسپل کارپوریشن، اور دیگر متعلقہ اداروں کے افسران نے شرکت کی۔
ڈپٹی کمشنر نے تمام محکموں کو ڈینگی کے خاتمے کے لیے مؤثر حکمت عملی اپنانے اور ہاٹ سپاٹس کی 100 فیصد سرویلنس یقینی بنانے کی ہدایت کی۔ انہوں نے واضح کیا کہ سرکاری اور نجی مقامات پر ڈینگی لاروا کی موجودگی پر سخت قانونی کارروائی کی جائے گی، جبکہ عوام میں آگاہی مہم کے ذریعے احتیاطی تدابیر اپنانے پر زور دیا جائے۔
اجلاس میں بتایا گیا کہ ڈینگی سرویلنس ٹیموں کو مزید متحرک کیا جا رہا ہے اور ان کی روزانہ کی بنیاد پر فیلڈ رپورٹس کا جائزہ لیا جائے گا۔ ڈپٹی کمشنر نے بوگس سرگرمیوں میں ملوث اہلکاروں کے خلاف سخت کارروائی کا عندیہ دیتے ہوئے کہا کہ ڈینگی کے خاتمے میں کسی قسم کی غفلت برداشت نہیں کی جائے گی۔
انہوں نے شہریوں کو ڈینگی سے محفوظ رکھنے کے لیے پانی کھڑا ہونے سے روکنے، گھروں اور دفاتر میں صفائی کا خاص خیال رکھنے، اور اسپرے مہم میں تعاون کرنے کی تلقین کی۔
سی ای او ہیلتھ ڈاکٹر ذاکر علی رانا نے اجلاس میں مختلف تجاویز پیش کیں اور بتایا کہ ڈینگی کی روک تھام کے لیے ہنگامی بنیادوں پر اقدامات کیے جا رہے ہیں۔ اجلاس کے اختتام پر ڈپٹی کمشنر نے تمام متعلقہ اداروں کو انسدادی کارروائیوں کو مزید تیز کرنے کی ہدایت جاری کی۔
