گورنر پنجاب سردار سلیم حیدر خان کا کہنا ہے کہ احتجاج اور لڑائی جھگڑے سے مسئلے حل نہیں ہوتے، پیپلزپارٹی کو بہت نقصان ہوا اب ن لیگ کی باری ہے۔
میڈیا سے گفتگو کے دوران گورنر پنجاب سردار سلیم حیدر خان کا کہنا ہے کہ دو تاریخ کو ہونیوالے مذاکرات کو خوش آئند سمجھتا ہوں، پیٹرول بم، سڑکوں پراحتجاج، لڑائی جھگڑے سے مسئلے حل نہیں ہوتے، تمام مسائل کا حل مذاکرات کی ٹیبل ہے اور مذاکرات کا عمل جاری رہنا چاہیے۔
سردار سلیم حیدر خان کی جانب سے حکومت خیبرپختونخوا پر تنقید کرتے ہوئے کہا گیا کہ خیبر پختونخوا حکومت کو ذرا پروا نہیں کہ وہ کرم ایجنسی کی طرف دیکھے، وزیراعلی سندھ نے کے پی حکومت کو یہ کہا کہ کرم ایجنسی آپ کا حصہ ہے۔
گورنر پنجاب نے کہا کہ مطالبات رکھتے ہیں اور کہتے ہیں کہ راستہ کھول دیتے ہیں، اس کا مطلب ہے کہ آپ نے خود راستہ بند کیا ہوا ہے۔
گورنر پنجاب کا کہنا ہے کہ پیپلزپارٹی کی کوئی ڈیمانڈ نہیں ہے، صرف جو تحریری معاہدے ہیں ان پر عمل کیا جائے تاکہ حکومت چل سکے۔
سردار سلیم حیدر کا کہنا ہے کہ ن لیگ سے اتحاد کرنے پر پیپلزپارٹی کو پنجاب میں بہت نقصان ہوا اب ن لیگ کی باری ہے۔
دوسری جانب چیئرمین پاکستان علما کونسل حافظ طاہر محمود اشرفی کا کہنا ہے کہ افغانستان ہمارا بھائی، ادب سے کہتے ہیں دھمکیاں نہ دے۔
