ڈپٹی کمشنر گجرات کی زیر صدارت ڈسٹرکٹ ایمرجنسی رسپانس کمیٹی کا اجلاس، انسداد ڈینگی مہم مزید تیز کرنے کی ہدایات۔
گجرات، ڈپٹی کمشنر گجرات صفدر حسین ورک کی زیر صدارت ڈسٹرکٹ ایمرجنسی رسپانس کمیٹی کا اجلاس منعقد ہوا، جس میں تمام متعلقہ محکموں کے افسران نے شرکت کی۔
اجلاس میں ڈینگی کے پھیلاؤ کو روکنے کے لیے جاری اقدامات کا تفصیلی جائزہ لیا گیا اور آئندہ سیزن کے پیش نظر حفاظتی اقدامات مزید مؤثر بنانے کی ہدایات دی گئیں۔
ڈپٹی کمشنر نے محکمہ صحت، میونسپل کارپوریشن اور دیگر اداروں کو ہدایت کی کہ ڈینگی لاروا کی تلفی، ہاٹ سپاٹس کی نگرانی اور عوامی آگاہی مہم کو تیز کیا جائے۔
انہوں نے گھروں، دفاتر اور عوامی مقامات پر صفائی یقینی بنانے پر زور دیتے ہوئے کہا کہ ڈینگی کے مکمل خاتمے کے لیے عوامی تعاون ناگزیر ہے۔
سی ای او ہیلتھ ڈاکٹر ذاکر علی رانا نے بریفنگ میں بتایا کہ انسداد ڈینگی ٹیمیں متحرک ہیں اور روزانہ کی بنیاد پر سرویلنس و رپورٹنگ جاری ہے۔
ڈپٹی کمشنر نے واضح کیا کہ کسی قسم کی غفلت برداشت نہیں کی جائے گی اور انسداد ڈینگی اقدامات کو ہر صورت مؤثر بنایا جائے گا۔ اجلاس کے اختتام پر متعلقہ محکموں کو کارکردگی مزید بہتر بنانے کے لیے ضروری ہدایات جاری کی گئیں۔
