پاکستان تحریک انصاف کے سیکریٹری جنرل سلمان اکرم راجا نے عمران خان کا سربراہ جے یو آئی (ف) کو پیغام دیتے ہوئے کہا ہے کہ بانی پی ٹی آئی نے کہا ہے کہ مولانا فضل الرحمان کو کہیں کہ یہ وقت ہے آپ ہمارا ساتھ دیں۔
پاکستان تحریک انصاف (پی ٹی آئی) کے سیکریٹری جنرل سلمان اکرم راجا نے انکشاف کیا ہے کہ بانی پی ٹی آئی عمران خان نے مولانا فضل الرحمان کو پیغام بھیجا ہے، جس میں ان سے ساتھ دینے کی درخواست کی گئی ہے۔
اسلام آباد میں عمر ایوب اور شبلی فراز کے ہمراہ پریس کانفرنس کرتے ہوئے سلمان اکرم راجا نے ملک میں بڑھتی ہوئی مہنگائی پر شدید تنقید کی۔ انہوں نے کہا کہ مارچ 2022 میں آٹے کی قیمت 20 روپے فی کلو تھی جو اب 100 روپے ہو چکی ہے، جبکہ گھی 350 سے بڑھ کر 500 روپے فی کلو تک پہنچ چکا ہے۔ ان کے مطابق، ملک میں 70 سے 80 فیصد مہنگائی ہو چکی ہے، لیکن عوام کی آمدنی میں کوئی اضافہ نہیں ہوا۔
انہوں نے کہا کہ معیشت کی بدحالی کی وجہ سے معاشرتی مسائل بڑھ رہے ہیں، نوکریاں ختم ہو چکی ہیں، اور عوام کا نظام پر اعتماد متزلزل ہو چکا ہے۔
سلمان اکرم راجا نے کہا کہ نوجوان نسل پاکستان میں مستقبل نہ دیکھتے ہوئے بیرون ملک جا رہی ہے۔ ان کے مطابق، ملک میں ٹیکس کا بوجھ صرف غریبوں پر ڈالا جا رہا ہے جبکہ امیر طبقے سے کوئی حساب نہیں لیا جا رہا۔
انہوں نے مزید کہا کہ عمران خان نے مولانا فضل الرحمان کو مخاطب کرتے ہوئے کہا ہے کہ "یہی وقت ہے کہ آپ ہمارا ساتھ دیں”۔
یہ بیان سیاسی حلقوں میں نئی بحث کو جنم دے رہا ہے، اور دیکھنا ہوگا کہ مولانا فضل الرحمان اس پیغام پر کیا ردعمل دیتے ہیں۔
