لاہور، صوبائی وزیر اطلاعات عظمیٰ بخاری کا کہنا ہے کہ بیرسٹر سیف ہمیشہ پنجاب پر تنقید کرکے خبروں میں زندہ رہنے کی بھونڈی کوشش کرتے ہیں۔
مشیر اطلاعات خیبرپختونخوا بیرسٹر سیف کے بیان پر ردعمل دیتے ہوئے وزیر اطلاعات پنجاب عظمیٰ بخاری نے کہا کہ بائیکر لین کا رنگ لوکل کمپنی نے ایک سال کی گارنٹی پر ٹیسٹ کے طور پر لگایا، وہی کمپنی دوبارہ بائیکر لین کا رنگ کرے گی، اس میں پنجاب حکومت کا ایک دھیلے کا بھی نقصان نہیں ہوا، نا ہی کوئی ادائیگی کی گئی۔
عظمیٰ بخاری نے کے پی حکومت کو کڑی تنقید کا نشانہ بناتے ہوئے کہا کہ پشاور کی بی آر ٹی پچھلے 5 سال میں چلی کم اورجلی زیادہ ہے، پشاور میٹرو کے آج بھی کے پی حکومت نے 60 ارب روپے ادا کرنے ہیں، پشاور بی آر ٹی کا کیس آج بھی عدالت میں چل رہا ہے۔
عظمیٰ بخاری نے کہا کہ بیرسٹر سیف ہمیشہ پنجاب پر تنقید کر کے خبروں میں زندہ رہنے کی بھونڈی کوشش کرتے ہیں، خیبر پختونخوا حکومت کے ترجمان نے آج تک قوم کو اپنے وزیراعلیٰ کی کارکردگی نہیں بتائی، پختونخوا میں آج بھی لوگ ندی نالوں سے ڈولیوں میں اور بائیکس کو کشتیوں سے عبور کرتے ہیں۔
ن لیگی رہنما کا کہنا ہے کہ پنجاب میں میٹرو بس، اورنج ٹرین کے بعد ٹرام اور انڈر گراؤنڈ گرین لائن بننے جا رہی ہے، جن کی اپنی کارکردگی بتانے لائق نہ ہو وہ دوسروں کے اچھے کاموں میں کیڑے ہی نکالتے ہیں۔
دوسری جانب اپوزیشن لیڈر قومی اسمبلی اور رہنما تحریک انصاف عمر ایوب کا کہنا ہے کہ عمران خان واحد سابق وزیراعظم ہیں جن کا جیل ٹرائل ہو رہا ہے۔
