لاہور، صوبائی وزیر اطلاعات عظمیٰ بخاری کا کہنا ہے کہ پنجاب کو حقیقی معنوں میں فوڈ باسکٹ صوبہ بنانے پر تیزی سے کام جاری ہے۔
اپنے ایک بیان میں وزیر اطلاعات پنجاب عظمیٰ بخاری نے کہا کہ پنجاب میں زراعت، صنعت اور انفراسٹرکچر کا دور اپنے عروج پر ہے، مریم نواز ہر شعبے میں انقلابی اور تاریخی اقدامات اٹھارہی ہیں، پنجاب کی تاریخ میں پہلی مرتبہ کسانوں کے لئے تاریخی 400 ارب کا کسان کارڈ پروگرام شروع کیا گیا ہے۔
عظمیٰ بخاری کا کہنا ہے کہ پنجاب کو حقیقی معنوں میں فوڈ باسکٹ صوبہ بنانے پر تیزی سے کام جاری ہے، کسانوں کو گرین ٹریکٹر، سپر سیڈرز اور کرایہ پر مشینری کی فراہمی کا سلسلہ بھی کامیابی سے جاری ہے، مریم نواز پنجاب کے تمام اضلاع میں بلاتفریق لوگوں کو ریلیف دے رہی ہیں۔
سینئر صوبائی وزیر کا کہنا ہے کہ رمضان نگہبان پیکیج کے تحت مستحق افراد کو ان کے گھر کے دہلیز پر راشن پہنچایا جائے گا، کے پی اور سندھ کا مریم نواز کے اچھے اقدامات کو فالو کرنا اچھی بات ہے، اگر مریم نواز کی وجہ سے باقی صوبوں کے لوگوں کو بھی ریلیف ملے گا تو یہ خوش آئند ہوگا۔
لیگی رہنما کا کہنا ہے کہ وزیراعلیٰ مریم نواز کا ویژن اور پالیسیاں صرف اور صرف عام آدمی کی فلاح و بہبود کے لئے ہیں، مخالفین مریم نواز کو ہدف تنقید بنانے کی بجائے اپنے لوگوں کے مسائل حل کرنے پر توجہ دیں۔
دوسری جانب سندھ حکومت کی جانب سے فزیکل ان فٹ گاڑیوں کے خلاف کریک ڈاؤن کرنے کا فیصلہ کرلیا گیا۔
سینئر وزیر شرجیل میمن کی زیر صدارت موٹر وہیکل انسپیکشن کے مؤثر نفاذ پر اہم اجلاس ہوا، جس میں شرجیل میمن نے سندھ بھر میں ایم وی آئی سینٹرز کے قیام کو تیز کرنے کی ہدایات دیں۔
