اسلام آباد، ترکیہ کے صدر رجب طیب اردوان کی وزیراعظم ہاؤس آمد پر وزیراعظم شہباز شریف کی جانب سے پرتپاک استقبال کیاگیا، مہمان صدر کیلئے پروقار استقبالیہ تقریب منعقد کی گئی۔
شاہراہ دستور کو ترکیہ اور پاکستانی پرچموں سے سجایا گیا ہے، اس موقع پر گلگت بلتستان، آزاد کشمیر اور چاروں صوبوں کا روایتی رقص بھی پیش کیا گیا۔
وزیراعظم ہاؤس پہنچنے پر وزیراعظم شہباز شریف نے ترکیہ کے صدر رجب طیب اردوان اور خاتون اول کا فقید المثال استقبال کیا، وزیراعظم شہبازشریف اور ترک صدر نے روایتی انداز میں مصافحہ کیا، دونوں رہنماؤں کے درمیان خوشگوار جملوں کا تبادلہ ہوا۔
مہمان صدر کو سلامی کے چبوترے پر لایا گیا جہاں دونوں ممالک کا ترانہ بجایا گیا، جس کے بعد ترک صدر کو مسلح افواج کے دستے نے گارڈ آف آنر پیش کیا، رجب طیب اردوان نے گارڈ آف آنر کا معائنہ کیا۔
اس موقع پر ترک صدر رجب طیب اردوان سے آرمی چیف جنرل عاصم منیر نے بھی مصافحہ کیا۔
وزیراعظم شہباز شریف نے ترک صدر کو فرداً فرداً تمام کابینہ اراکین کا تعارف کرایا، شہباز شریف کی جانب سے ترک صدر کے ساتھ آئے اعلیٰ سطحی وفد سے فرداً فرداً مصافحہ کیاگیا، مہمان صدر رجب طیب اردوان نے وزیراعظم ہاؤس کے احاطہ میں پودا بھی لگایا، اس موقع پر ملکی سلامتی اور پاک ترک تعلقات اور دونوں ملکوں کے استحکام کیلئے دعا کی گئی۔
