لاہور، پنجاب میں 1 لاکھ صارفین کے لیے سی ایم پنجاب فری سولر پینل اسکیم لانچ کردی گئی۔
وزیراعلیٰ پنجاب مریم نواز کی جانب سے سی ایم پنجاب فری سولر پینل اسکیم کا باقاعدہ افتتاح کردیا گیا، جسے حاصل کرنے کیلئے پنجاب کے صارفین آج سے ہی ایس ایم ایس یا آن لائن پورٹل پر گھر بیٹھے اپلائی کرسکتے ہیں۔
صوبائی سیکرٹری توانائی نے سی ایم پنجاب فری سولر پینل اسکیم کے بارے میں بریفنگ دیتے ہوئے بتایا کہ اس اسکیم کے تحت سال بھر میں 1 لاکھ سولر سسٹم لگائے جائیں گے، صوبے میں ماہانہ 200 یونٹ تک صرف کرنیوالے صارفین کو سولر سسٹم مفت دیا جائے گا اور 100 یونٹ ماہانہ صرف کرنے والے 52 ہزار 19 صارفین کو 550 واٹ کا مفت سولر سسٹم دیا جائے گا۔
بریفنگ میں یہ بتایا گیا کہ 200 یونٹ تک ماہانہ بجلی صرف کرنیوالے صارفین کو 1100 واٹ کا سولر سسٹم مفت دیا جائے گا اور سی ایم پنجاب فری سولر پینل اسکیم میں شفافیت کیلئے کمپیوٹرائزڈ قرعہ اندازی کی جائے گی۔
اس موقع پر وزیراعلیٰ مریم نواز نے کہا کہ فری سولر پینل اسکیم کا مقصد عوام کو مہنگی بجلی سے مستقل ریلیف دینا ہے، فی یونٹ 14 روپے سبسڈی سے پنجاب کے 73 لاکھ صارفین مستفید ہوئے، عوام کے وسائل عوام کی سہولت اور ریلیف کیلئے ہی خرچ ہوں گے۔
