امریکی صدارتی انتخابات میں 4 دن باقی رہ گئے، انتخابی مہم کے دوران ٹرمپ نے خواتین کے حوالے سے متنازع بیان دینے کے بعد خود کو خواتین کا محافظ بھی قرار دیدیا۔
وسکونسن میں انتخابی ریلی سے خطاب کرتے ہوئے کملا ہیرس اور جو بائیڈن کو تنقید کا نشانہ بناتے ہوئے ڈونلڈ ٹرمپ کا کہنا تھا کہ ان لوگوں نے جرائم پیشہ تارکین وطن کو امپورٹ کیا اور انہیں اس ملک میں داخل ہوکر ہماری بچیوں اور عورتوں پر حملے ریپ اور قتل کرنے کی اجازت دی۔
سابق صدر کا کہنا تھا کہ کوئی بھی شخص جو ان کو ہمارے بچوں کو اغوا کرنے اور مارنے دیتا ہے اسے اوول آفس کے قریب بھی نہیں ہونا چاہیے۔
ڈونلڈ ٹرمپ کا کہنا تھا کہ مجھے میری ٹیم نے منع کیا تھا کہ میں یہ جملہ ادا نہ کروں لیکن میں کہہ رہا ہوں کہ خواتین کو پسند ہو یا نہ ہو، میں انکی حفاظت کروںگا۔
سابق صدر نے مجمعے کو مخاطب کرتے ہوئے پوچھا کہ یہاں کوئی ایسی خاتون موجود ہے جو نہیں چاہتی کہ اس کی حفاظت کی جائے، کوئی خاتون ایسی ہے کہ جو یہ نہ چاہے کہ امریکی صدر اسکی حفاظت کرے۔
ڈونلڈ ٹرمپ نے خود کو خواتین کا محافظ قرار دیتے ہوئے یہ کہا کہ میں خواتین کی حفاظت یقینی بنائوں گا، چاہے لیڈیز مجھ سے اتفاق کریں یا نہ کریں۔
