پشاور، افغان شہریوں کے جعلی پاسپورٹ پر پاکستان سے بیرون ملک جانے کا انکشاف ہوا ہے۔
ایف آئی اے کا کہنا ہے کہ جعلی پاکستانی شناختی کارڈ اور پاسپورٹ بنانے میں ملوث 34 افغان شہریوں کو حراست میں لیا گیا ہے، ملزمان چمن کے راستے پاکستان میں داخل ہوئے، غیرملکی افراد نادرا سے جعلی قومی شناختی کارڈ اور پاسپورٹ بنوا کر بیرون ملک جارہے تھے۔
حکام کے مطابق ملزمان کی جانب سے پاکستان داخلے کے فی کس 12 ہزار روپے ادا کئے گئے، نادرا میگا سنٹر میں 2 مشتبہ غیر ملکیوں کی گرفتاری کے بعد ہاسٹل پر چھاپہ مارا گیا، ہاسٹل سے مزید 32 غیر ملکی حراست میں لیے گئے، ملزمان سے پاکستانی جعلی شناختی کارڈ، افغان پاسپورٹ اور دیگر دستاویزات برآمد ہوئیں۔
ایڈیشنل ڈائریکٹر ایف آئی اے نے کہا کہ گرفتار غیر ملکیوں میں نوجوان اور کم سن لڑکے شامل ہیں، ملزمان ایجنٹ کے ذریعے پاکستانی پاسپورٹ اور شناختی کارڈ حاصل کرنے کی کوشش کررہے تھے، ایجنٹ کی گرفتاری کے لیے تحرک جاری ہے۔
ایڈیشنل ڈائریکٹر ایف آئی اے کے مطابق ملزمان کا پاکستانی شناختی کارڈ اور پاسپورٹ پر گلف ممالک جانے کا پلان تھا، نادرا اور پاسپورٹ آفس ملازمین کے ملوث ہونے کا تعین تفتیش کے دوران کیا جائے گا۔
