اسلام آباد، چیئرمین پاکستان تحریک انصاف (پی ٹی آئی) بیرسٹر گوہر کی جانب سے تصدیق کی گئی ہے کہ چیف جسٹس نے گزشتہ روز ہونے والی ملاقات میں پی ٹی آئی کو سسٹم میں رہنے اور بائیکاٹ نہ کرنے کا مشورہ دیا۔
ڈسٹرکٹ کورٹ اسلام آباد کے باہر صحافیوں سے گفتگو کے دوران چیئرمین پی ٹی آئی بیرسٹر گوہر کا کہنا ہے کہ چیف جسٹس سے ملاقات میں یہ بات واضح کی گئی کہ پی ٹی آئی کو سسٹم کا حصہ بنے رہنا چاہیے اور بائیکاٹ سے گریز کرنا چاہیے۔
چیئرمین پی ٹی آئی کا کہنا ہے کہ حکومت کے خلاف پی ٹی آئی کی چارج شیٹ بہت طویل ہے اور ہم عدلیہ کے رویے سے زیادہ خوش نہیں ہیں، اس بارے میں ہم نے اپنی شکایات بھی پیش کی ہیں۔
بیرسٹر گوہر کا کہنا ہے کہ تحریک انصاف کے ساتھ اس طرح کے سلوک کا جمہوریت اور قانون کے اصولوں سے کوئی تعلق نہیں ہے، انہوں نے بتایا کہ پی ٹی آئی کا الائنس اپوزیشن کے ساتھ مل کر آئین کی سر بلندی اور ووٹ کی حفاظت کے لیے تحریک چلائے گا۔
چیئرمین پی ٹی آئی نے کہا کہ اگر کوئی پارٹی ڈسپلن کی خلاف ورزی کرتا ہے تو پی ٹی آئی اندرونی کارروائی کرے گی اور 9 مئی کے بعد پارٹی چھوڑنے والوں کے بارے میں خان صاحب فیصلہ کریں گے۔
دوسری جانب شاہد خاقان عباسی نے کہا کہ پاکستان کو آئین پر چلانے سے ہی معاملات حل ہوں گے، اگر ہم ملک کو آگے لیکر چلنا ہے ہمیں انصاف کی بنیاد فیصلے کرنا ہوں گے، ملکی مسائل کا حل انتہائی آسان ہے آئین پر عمل کیا جائے۔
