لاہور، چیئرمین پاکستان کرکٹ بورڈ (پی سی بی) محسن نقوی کا کہنا ہے کہ چیمپئنز ٹرافی پاکستان میں ہی ہوگی اور اگر بھارت کو تحفظات ہیں تو ہم سے بات کرے۔
لاہور میں میڈیا سے گفتگو کے دوران محسن نقوی کا کہنا تھا کہ قذافی اسٹیڈیم کا کام تیزی سے جاری ہے، قذافی اسٹیڈیم میں ترقیاتی کام مقررہ وقت پر مکمل ہوجائےگا، تمام انکلوژرز قائم رہیں گے، کوئی انکلوژر ختم نہیں کیا جا رہا ہے۔
چیئرمین پی سی بی کا کہنا تھا کہ ملک کی عزت سب سے پہلے، باقی باتیں بعد میں ہیں، چیمپئنز ٹرافی پاکستان میں ہی کرائیں گے، ہمارا رابطہ صرف آئی سی سی سے ہے، ان کے جواب کا انتظار ہے جب کہ بھارتی ٹیم کو تحفظات ہیں تو ہم سے بات کرے ،ہم بھارت کے تحفظات دور کریں گے۔
محسن نقوی کا کہنا تھا کہ مجھے سب اچھے کی امید ہے، کھیل اور سیاست دونوں علیحدہ علیحدہ چیزیں ہیں، ہم اپنے مؤقف پر قائم ہیں اور رہیں گے، آئی سی سی جلد چیمپئنز ٹرافی کے شیڈول کا اعلان کرے گا، ہمیں اپنی ورکنگ مکمل کرنی ہے ، باقی شیڈول بعد میں دیں گے۔
چیئرمین محسن نقوی کا کہنا تھا کہ وہاب ریاض مسلسل کام کر رہے ہیں، کسی کو ہٹایا نہیں تھا اور محمد یوسف کو بھی کہیں جانے نہیں دے رہے، میرے لیے کرکٹرز بہت ورتھ رکھتے ہیں ، میں کیسے کسی کو جانے دوں ، عبد الرزاق بھی میرے لیے اہم ہیں۔
ایک سوال کے جواب میں محسن نقوی نے کہا کہ چیمپئنز ٹرافی ٹورمنسوخ نہیں ہوا ابھی ری شیڈول ہوا ہے۔
