اقوام متحدہ میں پاکستان کی جانب سے غزہ میں مکمل اور فوری جنگ بندی پر زور دیتے ہوئے کہا گیا کہ عالمی برادری مقبوضہ فلسطینی علاقوں میں پائیدار امن کے قیام کو ترجیح دے۔
پاکستان کے متبادل مستقل مندوب عاصم افتخار نے سلامتی کونسل میں بریفنگ دیتے ہوئے کہا کہ اسرائیل کی مغربی کنارے میں جارحیت کو فوری روکا جائے، انسانی امداد کو ہتھیار کے طور پر استعمال نہیں کیا جاسکتا۔
عاصم افتخار کی جانب سے غزہ میں مکمل اور فوری جنگ بندی پر زور دیتے ہوئے کہا گیا کہ مشرق وسطیٰ میں بدامنی کی جڑ اسرائیل کا غیر قانونی قبضہ ہے، عالمی برادری مقبوضہ فلسطینی علاقوں میں پائیدار امن کے قیام کو ترجیح دے۔
مستقل مندوب عاصم افتخار کی جانب سے اپیل کی گئی کہ سلامتی کونسل فلسطینیوں کی جبری بے دخلی کے خلاف ڈٹ کر کھڑی ہو۔
دوسری جانب سعودی عرب اور عمان سمیت 7 ملکوں سے 48 گھنٹوں میں مزید 60 پاکستانیوں کو بے دخل کر دیا گیا۔
امیگریشن ذرائع کا بتانا ہے کہ سعودی عرب سے بلیک لسٹ 7، زائد المیعاد قیام پر 3 اور کنٹریکٹ کی خلاف ورزی پر 12 پاکستانیوں کو بے دخل کیا گیا ہے۔
