وزیر اعلیٰ پنجاب مریم نواز نے ترکیہ کے شہر انطالیہ میں ترک صدر رجب طیب اردوان سے ملاقات کی، اس موقع پر خاتون اول امینے اردوان بھی موجود تھیں۔
صدر اردوان نے مریم نواز کا ڈپلومیسی فورم میں شرکت پر شکریہ ادا کرتے ہوئے ان کا پرتپاک خیر مقدم کیا۔ ملاقات میں انہوں نے سابق وزیر اعظم نواز شریف کی خیریت دریافت کی اور ان کی صحت کے لیے نیک خواہشات کا اظہار کرتے ہوئے کہا کہ انشاء اللہ جلد ان سے ملاقات ہوگی۔
مریم نواز نے بھی نواز شریف کا خیر سگالی کا پیغام ترک صدر تک پہنچایا اور ترکیہ کے دورے کی دعوت دینے پر شکریہ ادا کیا۔
خیال رہے کہ مریم نواز آج ڈپلومیسی فورم 2025 سے خطاب کریں گی، ، ڈپلومیسی کانفرنس کا عنوان تقسیم دنیا میں مستقبل کی تعمیر، تعلیم! تبدیلی لانے کی ایک طاقت رکھا گیا ہے۔
اپنے خطاب میں وزیر اعلیٰ پنجاب تعلیم کے میدان میں حکومت پنجاب کے اقدامات اور اپنی جماعت کے منشور کو اجاگر کریں گی۔
دوسری جانب وفاقی وزیر احسن اقبال نے کہا ہے کہ بیلاروس کے حالیہ دوروں سے وزیر اعظم شہباز شریف اور نواز شریف کی کاوشوں کے مثبت ثمرات سامنے آئیں گے۔
میڈیا سے گفتگو کرتے ہوئے احسن اقبال کا کہنا تھا کہ بیلاروس کے ساتھ ہونے والے معاہدوں کی بدولت تقریباً ڈیڑھ لاکھ پاکستانی نوجوانوں کو روزگار کے مواقع میسر آئیں گے، اور دونوں ممالک کے باہمی تعلقات میں مزید بہتری آئے گی۔
انہوں نے کہا کہ پاکستان اور امریکہ کے باہمی تعلقات خوشگوار ہیں، اور کوئی بھی ملک دوسرے ملک کے اندرونی معاملات میں مداخلت نہیں کر رہا، بانی پی ٹی آئی کے حوالے سے بات کرتے ہوئے احسن اقبال نے کہا کہ وہ ایک سزا یافتہ شخص ہیں جن پر ساٹھ ارب روپے کی کرپشن کا الزام ہے۔
وفاقی وزیر نے طنز کرتے ہوئے کہا کہ اگر ان کی رہائی کے لیے مذاکرات کیے جا رہے ہیں تو پھر جیلوں میں بند چھوٹے جرائم میں ملوث افراد، جیسے جیب تراش اور موٹر سائیکل چور بھی رہائی کے مستحق قرار دیے جائیں۔
