بھارتی دارالحکومت نئی دہلی میں جاری ورلڈ پیرا ایتھلیٹکس چیمپئن شپ کے دوران جواہر لال نہرو اسٹیڈیم میں آوارہ کتوں کے حملوں نے ایونٹ کی ساکھ پر سوالات اٹھا دیے ہیں۔ حالیہ واقعات میں کینیا کے کوچ ڈینیس موانزو اور جاپان کے اسسٹنٹ کوچ میکو اوتوماستو کتوں کے کاٹنے سے زخمی ہو گئے۔
بھارتی میڈیا کے مطابق یہ اس ایونٹ کے دوران کتوں کے حملے کا پانچواں واقعہ ہے، جن میں ایک سکیورٹی گارڈ اور دو عام شہری بھی متاثر ہو چکے ہیں۔ بتایا گیا ہے کہ صرف 30 منٹ کے دوران اسٹیڈیم میں تین مختلف حملے پیش آئے۔
حملے کے بعد زخمی کوچز کو فوری طور پر قریبی اسپتال منتقل کیا گیا جہاں انہیں ابتدائی طبی امداد دی گئی۔ کینیا کے کوچ کی ٹانگ پر شدید زخم آیا جس سے خون بہنے لگا تھا۔
اس واقعے پر منتظمین کو سخت تنقید کا سامنا ہے، جبکہ عالمی سطح کے اس ایونٹ میں سیکیورٹی انتظامات پر بھی سوالات اٹھائے جا رہے ہیں۔ چیمپئن شپ کے مقابلے تاحال دہلی کے اسی اسٹیڈیم میں جاری ہیں۔
