راولپنڈی، چیف آف آرمی اسٹاف جنرل سید عاصم منیر کی جانب سے دہشت گردی کیخلاف جنگ میں پاکستانی قوم کی قربانیوں کا اعتراف کرتے ہوئے کہا گیا کہ ہم کبھی بھی فتنہ الخوارج کو ان کی فرسودہ سوچ ملک پر مسلط نہیں کرنے دیں گے۔
آئی ایس پی آر کے مطابق چیف آف آرمی اسٹاف جنرل سید عاصم منیر کی جانب سے پاکستان بھر سے آئے ہوئے نوجوان یونیورسٹی اور کالج کے طلبہ سے خطاب کیا گیا۔
آرمی چیف نے طلبہ کو علمی میدان میں بہترین کارکردگی دکھانے اور ایسی مہارتیں حاصل کرنے کی تلقین کی جو انہیں ملک کی ترقی میں مثبت کردار ادا کرنے کے قابل بنائیں۔
آئی ایس پی آر کا بتانا ہے کہ آرمی چیف نے پاکستان پر بیرونی ماحول کے اثرات خصوصاً سرحد پار دہشت گردی کے خطرے پر بھی روشنی ڈالی۔
آرمی چیف جنرل عاصم منیر نے نوجوانوں کی توانائی، تخلیقی صلاحیتوں اور جدت پسندی کی صلاحیت کو سراہتے ہوئے کہا گیا کہ ہمارے نوجوان پاکستان کے مستقبل کے رہنما ہیں۔
آرمی چیف نے اپنے خطاب میں ملک کی خود مختاری اور جغرافیائی سالمیت کے تحفظ میں پاک فوج کے کردار کو اجاگر کیا۔
آرمی چیف نے ملک کو دہشت گردی کے ناسور سے نجات دلانے میں قوم کی قربانیوں کا اعتراف کرتے ہوئے مسلح افواج اور قانون نافذ کرنے والے اداروں کے ساتھ عوام کی غیر متزلزل حمایت کو سراہا۔
چیف آف آرمی اسٹاف عاصم منیر نے نوجوانوں کو ‘پاکستانیت’ کے جذبے کو اپنانے کی تلقین کی اور کہا کہ یہ عناصر نوجوانوں کی فکری نشوونما میں بنیادی حیثیت رکھتے ہیں۔
چیف آف آرمی اسٹاف نے پاکستان بھر کی مختلف جامعات سے آنے والے طلبہ سے ملاقات کے دوران بات چیت کرتے ہوئے کہا کہ پاکستانی عوام بالخصوص نوجوانوں کا پاک فوج سے ایک انتہائی مضبوط رشتہ ہے۔
