کراچی، محکمہ جنگلی حیات سندھ کی جانب سے 4 ماہ کے لئے شکار پر سے پابندی اٹھا لی گئی۔
جاری کردہ نوٹیفکیشن کے مطابق پہلی بار کونسلر، یوسی نمائندوں کو پرمٹ اور بیگ لمٹ کی پڑتال کرنے کا اختیار دے دیا گیا، سندھ میں تیتر اور مرغابی کے شکار کے موسم کا آغاز 3 نومبر 2024 سے ہوگا۔
شکار کیلئے پرمٹ لازم ہوگا، ایک لائسنس پر 10 تیتر اور 15 مرغابیوں کا شکار کر سکیں گے، مقامی افراد کے علاوہ دیگر غیر ملکی مہمان شکار کا پرمٹ 100 ڈالر فیس ادا کر کے حاصل کرسکیں گے، شکار منظور شدہ شاٹ گن کے ساتھ کیا جا سکے گا۔
پرندوں کے لئے تعین کردہ بیگ لمٹ کی پابندی کرتے ہوئے صرف ہفتے اور اتوار کو شکار کیا جا سکے گا، قوانین کے مطابق سورج غروب ہو جانے کے بعد شکار ممنوع ہے، شکار کے لئے 2 درجن سے زائد علاقے مختص کئے گئے ہیں۔
جاری کردہ نوٹیفکیشن کےمتن کے مطابق ممنوعہ علاقوں میں کھیر تھر نیشنل پارک، تمام وائلڈ لائف سینکچوریز، کنٹونمنٹ ایریاز، پی اے ایف بیس، شہری و دیہی علاقے شامل ہیں۔
حکام کے مطابق محکمہ جنگلات اور جنگلی حیات کے اہلکاروں کے علاوہ پولیس اور قانون نافذ کرنیوالے ادارے اور تمام مجسٹریٹ پرمٹ اور بیگ لمٹ چیک کرسکتے ہیں، شکار کے سیزن کا اختتام 28 فروری 2025 کو ہو گا۔
