راولپنڈی، پاکستان تحریک انصاف (پی ٹی آئی) کے رہنما اعظم سواتی کا کہنا ہے کہ پارٹی کے بانی نے ہدایت دی ہے کہ جنید اکبر کی جانب سے کی گئی تقرریاں فوری طور پر منسوخ کی جائیں۔
بانی پی ٹی آئی سے ملاقات کے بعد گفتگو کرتے ہوئے اعظم سواتی نے کہا کہ انہوں نے انہیں مانسہرہ میں کرپشن سے متعلق معاملات سے آگاہ کیا۔
اعظم سواتی کاکہنا تھا کہ انہوں نےعمران خان کو پنجاب کی صورتحال پر بھی بریفنگ دی اور نشاندہی کی کہ عالیہ حمزہ کو مشکلات کا سامنا ہے۔
پی ٹی آئی کے سیکرٹری جنرل سلمان اکرم راجہ کا کہنا تھا کہ وہ اس معاملے پر جنید اکبر سے بات کریں گے۔
انہوں نے مزید کہا کہ اگر پنجاب میں کوئی مسئلہ درپیش ہے تو اس پر بھی تبادلہ خیال کیا جا سکتا ہے، جبکہ پارٹی میں کوئی اندرونی اختلاف نہیں، معمولی نوعیت کے معاملات چلتے رہتے ہیں۔
دوسری جانب پاکستان تحریک انصاف کے بانی عمران خان کا کہنا ہے کہ اگر پارٹی رہنماؤں پر کرپشن کے الزامات کی تحقیقات کرنے والی کمیٹی نے کوئی فیصلہ کیا ہے تو خیبر پختونخوا اسمبلی کے اسپیکر کو اپنے عہدے سے مستعفی ہو جانا چاہیے۔
اڈیالہ جیل راولپنڈی میں عمران خان سے ملاقات کے بعد میڈیا سے گفتگو کرتے ہوئے پی ٹی آئی کے سینئر رہنما اعظم خان سواتی نے بتایا کہ ان کی بانی پی ٹی آئی سے 2 دیگر افراد کے ساتھ ملاقات ہوئی، جس میں انہیں آگاہ کیا گیا کہ سلمان اکرم راجہ کسی بھی طرح کا سودا نہیں کریں گے۔
