اسلام آباد، انتظامیہ کی جانب سے جشن آزادی کے موقع پر باجوں کی فروخت پر پابندی عائد کردی گئی ہے۔
وفاقی دارالحکومت اسلام آباد کی ضلعی انتظامیہ نے جشن آزادی کے سلسلے میں لگنے والے اسٹالز پر باجوں کی فروخت پر پابندی عائد کردی ہے۔
ڈپٹی کمشنر عرفان نواز کی جانب سے تمام اسسٹنٹ کمشنرز کو اسٹالز پر بکنے والے باجوں کو قبضے میں لینے کے احکامات جاری کردیے ہیں۔
ڈی سی عرفان نواز کا کہنا تھا کہ مختلف اسٹالز پر باجوں کی فروخت سرعام جاری ہے، باجوں کے استعمال پر مکمل طور پر پابندی عائد کی گئی ہے۔
عرفان نواز کا یہ کہنا تھا کہ اسٹال مالکان سے گزارش کہ وہ اپنے پاس باجوں کی فروخت بند کریں، باجے کا استعمال یا فروخت کرنیوالوں کے خلاف قانونی کارروائی ہوگی۔
ڈپٹی کمشنر عرفان نواز کا یہ کہنا تھا کہ شہریوں سے درخواست ہے کہ باجوں کے استعمال سے گریز کریں۔
واضح رہے کہ 14 اگست پاکستان کی آزادی کا دن ہوتا ہے، پورے ملک میں جشن آزادی کے موقع پر مختلف پروگرامز کا اہتمام کیا جاتا ہے، لیکن گزشتہ کچھ سالوں سے 14 اگست کے سلسلے میں عوام کی جانب سے باجوں کا بے دریغ استعمال کیا جاتا ہے، جس سے معاشرے میں شور کی آلودگی جیسے مسائل پیدا ہورہے ہیں۔
