پشاور، رہنما پی ٹی آئی و سینیٹر شبلی فراز کا کہنا ہے کہ انصاف دینے والے کمزور ہو جائیں تو ملک ترقی نہیں کرتا۔
پشاور میں نجی ٹی وی چینل سے خصوصی گفتگو کے دوران پی ٹی آئی رہنما شبلی فراز نے کہا کہ عدالتوں کا کام انصاف دینا ہے، انصاف دینے والے اداروں میں کمزوری آجائے تو لوگ خود کو غیر محفوظ سمجھتے ہیں، ایسی صورت حال میں ملک ترقی نہیں کرتا لوگ خوشحال نہیں ہوتے۔
شبلی فراز نے کہا کہ آئین میں لکھا ہے ریاست جان و مال کی حفاظت کی گارنٹی دیتی ہے، جب لوگ سمجھیں کہ ایسا ممکن نہیں تو لوگ سرمایہ کاری نہیں کرینگے، کسی بھی معاشرے کی اصل بنیاد انصاف ہے۔
پی ٹی آئی رہنما کا کہنا ہے کہ ہم ایک سیاسی جماعت ہیں اور اپوزیشن میں ہیں، ہمیں اپوزیشن بنا دیا گیا ہے لیکن ہم سیاسی جدوجہد کرینگے، اپوزیشن جماعتوں کا سیاسی اتحاد بننے جارہا ہے۔
اسکے بعد پشاور ہائیکورٹ میں سینیٹر شبلی فراز اور فیصل جاوید کی جانب سے مقدمات کی تفصیلات کیلئے دائر درخواست پر سماعت ہوئی۔
عدالت عالیہ کی جانب سے دونوں پی ٹی آئی رہنماؤں کی حفاظتی ضمانت میں 5 مارچ تک توسیع کرتے ہوئے کسی بھی مقدمہ میں گرفتار نہ کرنے کا حکم دے دیاگیا۔
