اسلام آباد، پاکستان پیپلز پارٹی کی نائب صدر سینیٹر شیری رحمٰن نے کہا ہے کہ عالمی سطح پر پاکستان ان 10 ممالک میں شامل ہے جو شدید پانی کی قلت کا شکار ہیں، اور اقوامِ متحدہ کے مطابق رواں سال ملک میں خشک سالی کے خطرات بڑھ گئے ہیں۔
روزنامہ جنگ کی رپورٹ کے مطابق، ورلڈ واٹر ڈے کے موقع پر اپنے پیغام میں شیری رحمٰن نے کہا کہ اس دن کا بنیادی مقصد عوام میں پانی کی اہمیت اور اس کے مؤثر تحفظ سے متعلق شعور بیدار کرنا ہے۔
شیری رحمٰن نے خبردار کیا کہ تربیلا اور منگلا ڈیم چند دنوں میں ڈیڈ لیول پر پہنچ سکتے ہیں، جس کے باعث رواں ربیع سیزن کی فصلوں پر سنگین اثرات مرتب ہونے کا خدشہ ہے۔ ملک میں 40 فیصد کم بارشوں اور برف باری کے نتیجے میں خشک سالی کی صورتِ حال پیدا ہو چکی ہے۔
انہوں نے کہا کہ ٹیوب ویلز کے غیر متوازن استعمال اور موسمیاتی تبدیلیوں کی وجہ سے زیرِ زمین پانی کی سطح ہر سال ایک میٹر نیچے جا رہی ہے، مستقبل میں بڑھتی آبادی اور درجہ حرارت میں اضافے کے باعث پانی کی طلب میں نمایاں اضافے کا امکان ہے۔
شیری رحمٰن کا کہنا تھا کہ غیر مستحکم زرعی نظام اور دیگر عوامل کی وجہ سے بھی پانی کی طلب میں غیر معمولی اضافہ ہو سکتا ہے۔ ہمارے ہاں فی کس پانی کا استعمال دیگر ممالک کے مقابلے میں پہلے ہی کہیں زیادہ ہے۔ اگر بروقت اقدامات نہ کیے گئے تو مستقبل میں ملک کو خشک سالی اور غذائی قلت جیسے سنگین مسائل کا سامنا کرنا پڑ سکتا ہے۔
انہوں نے کہا کہ پانی کے وسائل کے مؤثر تحفظ کے لیے نیشنل ایڈاپٹیشن پلان، لیونگ انڈس، بارش کے پانی کے ذخیرے کے منصوبے اور دیگر پالیسیوں پر فوری عملدرآمد کیا جانا چاہیے۔
