وزیراعلیٰ پنجاب مریم نواز کی جانب سے اسموگ کی صورتحال میں جنگی بنیادوں پر کام کرنے کی ہدایت کردی گئی۔
وزیراعلیٰ پنجاب مریم نواز کی جانب سے ماحولیاتی قوانین پر عمل درآمد کی ہدایت کی گئی اور ماسک پہننا لازمی قرار دے دیا گیا۔
دوسری جانب سینئر صوبائی وزیر مریم اورنگزیب نے کہا کہ شہری ماحولیاتی آلودگی کے خلاف جہاد میں بھرپور حصہ لیں، بھارت سے تیز ہواؤں کیساتھ آنیوالی اسموگ سے بچاؤ میں ہر شہری کو کردار ادا کرنا ہوگا۔
مریم اورنگزیب کا کہنا تھا کہ اسموگ پر قابو پانے کے ایس او پیز پر عملدرآمد میں کوتاہی برداشت نہیں ہوگی، شہر اقتدار میں سیاہ دھوئیں والی گاڑیاں، چمنیاں بند رہیں گی اور فصلوں کی باقیات جلائی گئیں تو گرفتاریاں عمل میں آئیں گی۔
سینئر صوبائی وزیر نے کہا کہ اسموگ کی شدت میں کمی کیلئے لاہور میں ہنگامی ٹریفک پلان جاری کیا جارہا ہے۔
دوسری جانب شہر اقتدار میں فضائی آلودگی کے باعث پیدا ہونیوالی اسموگ کی مقدار انتہائی خطرناک سطح پر پہنچ گئی، حد نگاہ بھی متاثر ہونے لگی اور شہریوں میں آنکھ، ناک اور گلے کی شکایات سامنے آنے لگیں۔
