پاکستان تحریک انصاف (پی ٹی آئی) کے رہنما اور قومی اسمبلی میں اپوزیشن لیڈر عمر ایوب نے کہا ہے کہ پارٹی مذاکرات کے لیے تیار ہے۔
پاکستان تحریک انصاف (پی ٹی آئی) کے رہنما اور قومی اسمبلی میں اپوزیشن لیڈر عمر ایوب نے کہا ہے کہ مذاکرات انسان کریں یا فرشتے، ہم تیار ہیں، لیکن اگر ہمارے مطالبات تسلیم نہ کیے گئے تو سول نافرمانی کی تحریک شروع ہوگی۔
پشاور ہائی کورٹ کے باہر میڈیا سے گفتگو کرتے ہوئے عمر ایوب نے واضح کیا کہ قومی حکومت مسائل کا حل نہیں، ملک کو عدل اور انصاف سے ہی آگے بڑھایا جا سکتا ہے۔
اس موقع پر سینیٹ میں قائد حزب اختلاف شبلی فراز نے شکوہ کیا کہ قانون سازی کے بجائے عدالتوں کے بے بنیاد کیسز میں وقت ضائع کیا جا رہا ہے۔
پشاور ہائی کورٹ میں پی ٹی آئی رہنماؤں عمر ایوب، شاندانہ گلزار، ارباب شیر علی، ارباب عامر ایوب، اور آصف خان کی راہداری ضمانت کی درخواستوں پر سماعت ہوئی۔
چیف جسٹس اشتیاق ابراہیم نے کیس کی سماعت کرتے ہوئے عمر ایوب کو فیصل آباد کیس میں 9 جنوری تک راہداری ضمانت دے دی، جبکہ دیگر درخواست گزاروں کو تین ہفتے کی راہداری ضمانت فراہم کی گئی۔
وکیل معظم بٹ ایڈووکیٹ نے عدالت کو بتایا کہ ان کے مؤکلین کے خلاف تین مقدمات اسلام آباد اور ایک فیصل آباد میں درج ہیں۔
عمر ایوب نے عدالت کو آگاہ کیا کہ فیصل آباد کیس میں پیشی کے دوران انہیں راولپنڈی سے گرفتار کیا گیا، حالانکہ ان کے پاس حفاظتی ضمانت موجود تھی۔
انہوں نے استدعا کی کہ عدالت انہیں فیصل آباد کیس میں مزید وقت فراہم کرے۔ اس پر چیف جسٹس نے 9 جنوری تک ضمانت منظور کر لی۔
