لاہور: معروف یوٹیوبر سعد الرحمان عرف ڈکی بھائی نے جوا ایپس کیس میں گرفتاری اور 100 روز کی خاموشی کے بعد پوری قوم سے معافی مانگ لی ہے۔ انہوں نے اپنی یوٹیوب ویڈیو میں وضاحت کرتے ہوئے کہا کہ اگر ان کے کانٹینٹ سے کسی کو نقصان یا نیگٹیو اثر پہنچا ہو تو وہ اس کے لیے معذرت خواہ ہیں۔
ویڈیو میں ڈکی بھائی کی وضاحت
ڈکی بھائی نے ویڈیو کے آغاز میں کہا کہ اگر کوئی یہ سمجھے کہ ویڈیو کا مقصد صرف ان پر ہونے والی ایف آئی آر کی جسٹیفکیشن ہے تو وہ معذرت کرتے ہیں۔ انہوں نے مزید کہا کہ ان کی ہمیشہ کوشش رہی ہے کہ لوگ ان کے کانٹینٹ سے محظوظ ہوں اور کچھ نیا دیکھیں، تاہم اگر جان بوجھ کر یا انجانے میں کوئی ایسا مواد اپلوڈ ہوا جس سے منفی اثر پڑا ہو یا کسی پروموشن نے نیگٹیو امپیکٹ ڈالا ہو تو وہ پوری قوم سے معافی مانگتے ہیں۔
قانونی کارروائی اور تعاون
ڈکی بھائی نے کہا کہ وہ عدالتی معاملات کو قانونی طور پر آخر تک دیکھیں گے اور عدالت کے ساتھ مکمل تعاون کے لیے تیار ہیں۔ انہوں نے کہا کہ کیس کا جج جو بھی فیصلہ کریں گے وہ اسے قبول کریں گے۔
ڈکی بھائی کی کیمپ جیل سے رہائی، عدالت کی روبکار جاری ہوتے ہی آزاد کر دیا گیا
گرفتاری کا واقعہ اور ذاتی تجربہ
ڈکی بھائی نے بتایا کہ 16 اگست 2025 کو وہ خوشی کے ساتھ اپنے گھر میں دعوت کے بعد غیر ملکی ایونٹ کے لیے پیکنگ کر رہے تھے، لیکن اس دوران انہیں گرفتاری کا سامنا کرنا پڑا۔ واضح رہے کہ انہیں 17 اگست کو جوا ایپس کے ذریعے منی لانڈرنگ کے الزام میں لاہور ایئرپورٹ سے گرفتار کیا گیا تھا۔
ضمانت اور رہائی
لاہور ہائیکورٹ نے 10 لاکھ روپے کے مچلکوں کے عوض ڈکی بھائی کی ضمانت منظور کی، اور انہیں 26 نومبر کو ضمانت پر رہا کر دیا گیا۔ اس دوران انہوں نے اپنے اور اپنے خاندان کے ساڑھے تین ماہ کے تجربے کے بارے میں بھی ویڈیو میں بتایا۔
