نامور ماڈل اور اداکارہ سنیتا مارشل کا کہنا ہے کہ ان کی اور اداکارہ ماہرہ خان کی شکلیں اتنی ملتی ہیں کہ جب بھی ملاقات ہوتی ہے، دونوں ایک دوسرے کو بچھڑی ہوئی بہنیں کہہ کر مخاطب کرتی ہیں۔
’نیوز 365‘ پر اشنا شاہ کے شو میں گفتگو کرتے ہوئے سنیتا نے بتایا کہ ماڈلنگ کی دنیا میں ان کا سفر بہت کم عمری میں شروع ہوا۔ وہ محض 18 سال کی تھیں جب ان کا پہلا شیمپو کا اشتہار سامنے آیا، اور اس کے بعد ایک لمبا سفر شروع ہوا جس میں انہوں نے ملک بھر میں مختلف اشتہارات کے لیے شوٹنگز کیں۔
سنیتا مارشل نے انکشاف کیا کہ وہ تقریباً 20 سال ماڈلنگ کے شعبے سے وابستہ رہیں، لیکن اب وہ باقاعدہ طور پر ماڈلنگ سے ریٹائر ہو چکی ہیں تاکہ نئے چہروں کو جگہ ملے۔ ان کا کہنا تھا، "20 سال ماڈلنگ میں گزار دینا کوئی معمولی بات نہیں۔”
انہوں نے بتایا کہ کورونا وبا کے دوران لاہور میں ہونے والے ایک فیشن شو کے بعد وہ خود بھی کورونا کا شکار ہوئیں، اور شدید بیماری کے بعد یہ فیصلہ کیا کہ اب ماڈلنگ کو خیر باد کہہ دیا جائے۔
اپنی خوبصورتی کے راز پر بات کرتے ہوئے سنیتا مارشل نے کہا کہ ان کی خوبصورتی قدرتی ہے اور انہیں والدین سے وراثت میں ملی ہے۔ وہ کسی میک اپ پروسیجر کی قائل نہیں بلکہ صحت مند طرز زندگی، متوازن غذا اور ورزش پر یقین رکھتی ہیں۔
شو کی میزبان اشنا شاہ نے جب ان سے پوچھا کہ آج وہ ماہرہ خان کی ہم شکل کیوں لگ رہی ہیں؟ تو سنیتا نے مسکراتے ہوئے کہا، "ہم دونوں کی شکلیں واقعی بہت ملتی ہیں، خاص طور پر تصاویر اور ویڈیوز میں تو لگتا ہے جیسے ہم جڑواں ہوں۔” انہوں نے مزید کہا کہ وہ اور ماہرہ اکثر مذاق میں ایک دوسرے کو ’بچھڑی ہوئی بہنیں‘ کہتے ہیں۔
ان کا ماننا ہے کہ دونوں کے چہروں میں خاصی مماثلت ہے، خاص طور پر ہونٹ اور چہرے کی ساخت کافی حد تک ایک جیسی ہے۔
