واشنگٹن، امریکا سے بے دخل تارکین وطن کو قبول کرنے کے فیصلے کے بعد ٹرمپ انتظامیہ کی جانب سے کولمبیا کے خلاف لیے جانے والے سخت اقدامات روک دیے گئے۔
غیر ملکی میڈیا کا بتانا ہے کہ امریکی صدر ڈونلڈ ٹرمپ کی کولمبیا کو ٹیرف بڑھانے کی دھمکی کام کرگئی جس کے بعد کولمبیا امریکا سے بے دخل کیے گئے تارکین وطن کو قبول کرنے پر رضا مند ہوگیا ہے۔
اس سے پہلے امریکا سے تارکین وطن کی بے دخلی کے فیصلے پر کولمبیا کے صدر نے تارکین وطن کو واپس قبول کرنے سے انکار کرتے ہوئے کہا کہ ملک بدر کیے جانیوالے تارکین وطن کو لیجانے والی پروازوں کو اس وقت تک روکیں گے جب تک تارکین وطن کو باوقار طریقے سے نہیں بھیجا جاتا۔
ٹرمپ کی جانب سے کولمبیا کے تارکین کو واپس لینے سے انکار پر25 فیصد تجارتی ٹیرف اور ویزہ پابندیوں سمیت دیگر سخت اقدامات کی دھمکی دی گئی تھی اور اس کا ڈرافٹ تیار تھا مگر اس فیصلے کو اب روک دیا گیا ہے۔
یاد رہے کہ اقتدار سنبھالتے ہی ٹرمپ کی جانب سے غیر قانونی امیگریشن کو قومی ایمرجنسی قرار دیتے ہوئے ایک وسیع کریک ڈاؤن نافذ کرنے کا اعلان کیا گیا تھا جس کے بعد اب تارکین وطن کو امریکا بدر کرنے کا سلسلہ شروع ہوگیا ہے۔
یاد رہے کہ امریکی صدر ڈونلڈ ٹرمپ کی انتظامیہ نے ایک درجن سے زائد اہم سرکاری اداروں کے آزادنہ حیثیت میں کام کرنیوالے انسپکٹر جنرلز کو برطرف کر دیا ہے۔
