لاہور،معروف سٹیج اور ٹی وی اداکار و کامیڈین جاوید کوڈو 63 سال کی عمر میں لاہور میں انتقال کر گئے۔
اہل خانہ کے مطابق جاوید کوڈو طویل عرصے سے بیمار تھے اور جنرل ہسپتال لاہور میں زیر علاج تھے۔
جاوید کوڈو نے 1980 کی دہائی میں اپنے فنی کیریئر کا آغاز کیا اور اپنی منفرد اداکاری، مزاحیہ انداز اور چھوٹے قد کی وجہ سے جلد ہی عوام میں مقبولیت حاصل کر لی، انہوں نے 150 سے زائد اردو و پنجابی فلموں، سیکڑوں سٹیج ڈراموں اور ٹی وی شوز میں اپنی اداکاری کے جوہر دکھائے۔
اداکار جاوید کوڈو سوگواران میں اپنی بیوہ، دو بیٹے اور ایک بیٹی کو چھوڑ گئے۔
جاوید کوڈو کی نماز جنازہ سنگھ پورہ پرانی منڈی گراؤنڈ لاہور میں ادا کی گئی، سینئر اداکار جواد وسیم نے نماز جنازہ پڑھائی۔
جنازے میں سہیل احمد عرف عزیزی، نسیم وکی، افضل خان عرف جان ریمبو، نوید انجم، کاشف محمود، شکیل چن، عابد شاہ اور دیگر تھیٹرز اور ٹی وی اداکاروں کے علاوہ عوام کی بڑی تعداد نے شرکت کی، اس موقع پر اداکاروں نے مرحوم کے بیٹوں سلمان اور طیب سے تعزیت کی۔
وزیراعظم شہباز شریف نے جاوید کوڈو کی وفات پر گہرے دکھ کا اظہار کیا اور مرحوم کی مغفرت اور اہل خانہ کے لیے صبر کی دعا کی،نہوں نے کہا کہ جاوید کوڈو، جو اپنے چھوٹے قد اور بڑی اداکاری کے لیے مشہور تھے، کی وفات سے میڈیا انڈسٹری میں ایسا خلا پیدا ہو گیا ہے جو شاید کبھی پر نہ ہو سکے، اس مشکل وقت میں ہماری تمام تر ہمدردیاں مرحوم کے اہل خانہ کے ساتھ ہیں۔
