وفاقی وزراء چوہدری سالک حسین اور عبد العلیم خان کے درمیان قومی اسمبلی اجلاس کے دوران اہم ملاقات ہوئی، جس میں ملکی سیاسی صورتحال اور عوامی مسائل پر گفتگو کی گئی۔
اسلام آباد: وفاقی وزیر برائے سمندر پار پاکستانی چوہدری سالک حسین نے گزشتہ روز قومی اسمبلی کے اجلاس میں خصوصی شرکت کی، جہاں ان کی وفاقی وزیر برائے مواصلات عبد العلیم خان سے اہم ملاقات ہوئی۔ اس ملاقات میں ملک کی موجودہ سیاسی صورتحال، عوامی مسائل اور دیگر قومی امور پر تفصیلی تبادلہ خیال کیا گیا۔
ذرائع کے مطابق، عبد العلیم خان نے ملاقات کے دوران پاکستان مسلم لیگ (ق) کے صدر اور سابق وزیراعظم چوہدری شجاعت حسین کی خیریت دریافت کی اور ان کی صحت کے لیے نیک تمناؤں کا اظہار بھی کیا۔
دونوں وفاقی وزراء نے اس بات پر اتفاق کیا کہ اتحادی حکومت قومی استحکام اور ترقی کے لیے متحد ہو کر کام کر رہی ہے، اور آئندہ بھی ملکی مفاد کو مقدم رکھتے ہوئے مشترکہ کوششیں جاری رکھی جائیں گی۔
یاد رہے کہ چوہدری سالک حسین اور عبد العلیم خان دونوں اتحادی حکومت کا حصہ ہیں، اور حالیہ مہینوں میں سیاسی معاملات پر ان کی مشاورت کو خاص اہمیت دی جا رہی ہے، جو حکومتی پالیسیوں میں ہم آہنگی کا مظہر ہے۔
