اگر آپ روزانہ 10 ہزار قدم چلنے کا ہدف پورا نہیں کر پاتے تو پریشان ہونے کی ضرورت نہیں ہے۔ حالیہ تحقیق کے مطابق، روزانہ صرف 7 ہزار قدم چلنا بھی آپ کی صحت پر مثبت اثرات مرتب کرتا ہے اور مختلف بیماریوں جیسے دل کی بیماری، ذیابیطس، ڈپریشن، اور قبل از وقت موت کے خطرے کو کم کرتا ہے۔
یہ تحقیق آسٹریلیا کی یونیورسٹی آف سڈنی کے پروفیسر میلوڈی ڈِنگ کی سربراہی میں کی گئی، جس میں دنیا کے 10 مختلف ممالک سے 160,000 بالغ افراد کے ڈیٹا کا تجزیہ کیا گیا۔ اس تحقیق کو عالمی طبی جریدے "دی لینسٹ پبلک ہیلتھ” میں شائع کیا گیا، اور یہ اب تک کی سب سے بڑی تحقیق سمجھی جا رہی ہے جو قدموں کی تعداد اور صحت کے تعلق کو سمجھاتی ہے۔
تحقیق میں یہ بات سامنے آئی کہ جو افراد روزانہ 7 ہزار قدم چلتے ہیں، ان میں درج ذیل خطرات میں نمایاں کمی دیکھنے کو ملی:
- جلد موت کا خطرہ 47 فیصد کم
- دل کی بیماری کا خطرہ 25 فیصد کم
- ڈیمنشیا کا خطرہ 38 فیصد کم
- ڈپریشن کا خطرہ 22 فیصد کم
- ٹائپ 2 ذیابیطس کا خطرہ 14 فیصد کم
- حادثاتی طور پر گرنے کا خطرہ 28 فیصد کم
- کینسر کا خطرہ 6 فیصد کم
کیا 15,000 قدم چلنا واقعی زندگی کا دورانیہ بڑھا سکتا ہے؟
عام طور پر یہ سمجھا جاتا ہے کہ روزانہ 10 ہزار قدم چلنا ضروری ہے، لیکن محققین کے مطابق یہ ہدف 1960 کی دہائی میں جاپان میں ایک پیڈومیٹر کی مارکیٹنگ مہم سے مشہور ہوا تھا، نہ کہ سائنسی تحقیق سے۔ ڈاکٹر کیتھرین اووین نے کہا کہ اگر آپ پہلے سے ہی جسمانی سرگرمی میں مشغول ہیں تو 10 ہزار قدم بہتر ہو سکتے ہیں، لیکن عام افراد کے لیے 7 ہزار قدم بھی کافی فائدہ مند ہیں۔
تحقیق میں یہ بھی پایا گیا کہ اگر کسی شخص نے پہلے 2 ہزار قدم چلنے کی عادت ڈالی ہو، تو اگر وہ اسے بڑھا کر 4 یا 5 ہزار تک لے جائے تو اسے فوری طور پر فائدہ پہنچ سکتا ہے۔
ہر اضافی 1,000 قدم کے ساتھ، صحت کے خطرات میں کمی آتی ہے۔ نوجوانوں اور بزرگ افراد دونوں کے لیے اس کے فوائد ہیں، اور بزرگ افراد بھی 10 ہزار سے زائد قدم چل کر فائدہ حاصل کر سکتے ہیں۔
اس تحقیق کے نتائج کے مطابق، جلد موت کے خطرے میں سب سے بڑی کمی دیکھی گئی، ساتھ ہی دل کی بیماری اور ڈیمنشیا سے بچاؤ میں بھی نمایاں بہتری آئی۔ البتہ، کینسر اور جسمانی صلاحیت کے حوالے سے نتائج ابھی تک حتمی نہیں ہیں، کیونکہ اس پر مزید تحقیق کی ضرورت ہے۔
