برطانیہ میں پاکستانی صحافیوں کی نئی قیادت کا اعلان، پاکستان کا مثبت تشخص اجاگر کرنے کا عزم
لندن: برطانیہ میں مقیم سینئر پاکستانی صحافیوں نے پاکستان پریس کلب یوکے انٹرنیشنل (PPCUK International) کی نئی قیادت منتخب کرلی ہے، جس نے پیشہ ورانہ صحافت کے فروغ، پاکستان کے مثبت تشخص کو اجاگر کرنے اور برطانوی پاکستانی کمیونٹی کے ساتھ روابط مزید مضبوط بنانے کے عزم کا اظہار کیا ہے۔
نئی منتخب قیادت میں حسیب ارسلان وائس چیئرمین، شوکت ڈار صدر، عرفان الحق سینئر نائب صدر، نسیم صدیقی نائب صدر، صفینہ خان جنرل سیکریٹری، سید سبطین علی انفارمیشن سیکریٹری، آمنہ چوہدری جوائنٹ سیکریٹری، ذوالفقار علی ایڈیشنل سیکریٹری اور پرویز اقبال فنانس سیکریٹری شامل ہیں۔
پاکستان ہائی کمیشن لندن کے سینئر عہدیدار اور پریس منسٹر علی نواز ملک نے نو منتخب عہدیداران کو مبارکباد دیتے ہوئے برطانیہ میں مقیم پاکستانی صحافیوں کی جانب سے پاکستان کا سافٹ امیج اجاگر کرنے کی کوششوں کو سراہا۔
علی نواز ملک نے کہا کہ برطانیہ میں خدمات انجام دینے والے پاکستانی صحافی پاکستان کے سفیر ہیں اور انہوں نے پاکستان کی کامیابیوں کو اجاگر کرنے اور پاکستانی کمیونٹی کو باخبر رکھنے میں اہم کردار ادا کیا ہے۔
انہوں نے یقین دلایا کہ پاکستان ہائی کمیشن صحافیوں کو ان کی پیشہ ورانہ ذمہ داریاں انجام دینے میں ہر ممکن تعاون فراہم کرے گا اور نئی قیادت کے ساتھ قریبی تعاون کا خواہاں ہے۔
چیئرمین اظہر جاوید نے کہا کہ پاکستان پریس کلب یوکے انٹرنیشنل صحافت کے اعلیٰ معیار، پیشہ ورانہ اخلاقیات کے فروغ اور برطانیہ میں پاکستانی صحافیوں کے درمیان اتحاد کے لیے اپنا کردار ادا کرے گا۔
انہوں نے کہا کہ کلب صحافیوں کے لیے ایک معتبر پلیٹ فارم کے طور پر کام جاری رکھے گا اور ذمہ دارانہ اور متوازن صحافت کے ذریعے پاکستان کی کامیابیوں اور مثبت تشخص کو عالمی سطح پر اجاگر کیا جائے گا۔
وائس چیئرمین حسیب ارسلان نے کہا کہ موجودہ وقت میں پاکستان کو دنیا بھر میں مزید مضبوط اور مثبت تشخص کی ضرورت ہے۔
انہوں نے کہا، “اس وقت پاکستان کو دنیا بھر میں ایک مضبوط اور مثبت امیج کی ضرورت ہے۔ ہماری تنظیم بیرون ملک پاکستانی کمیونٹی کے ساتھ مل کر پاکستان کی کامیابیوں کو اجاگر اور ملک کے بارے میں متوازن اور تعمیری بیانیہ پیش کرے گی۔”
صدر شوکت دار نے میڈیا کمیونٹی کے اتحاد کا خیرمقدم کرتے ہوئے کہا کہ مختلف اداروں سے وابستہ سینئر اور فعال صحافیوں کا ایک پلیٹ فارم پر متحد ہونا خوش آئند ہے۔
انہوں نے کہا، “اس تنظیم کی اصل طاقت یہ ہے کہ تجربہ کار اور فعال صحافی پیشہ ورانہ اور کمیونٹی کے اجتماعی مفاد کے لیے ایک پلیٹ فارم پر متحد ہیں۔”
جنرل سیکریٹری سفینہ خان نے کہا کہ نئی ٹیم پاکستان اور برطانیہ میں پاکستانی کمیونٹی کی خدمت کے لیے پرعزم ہے۔
انہوں نے کہا، “ہم پاکستان کے لیے کام کریں گے اور پاکستان، پاکستانی کمیونٹی اور میڈیا اداروں کے درمیان پل کا کردار ادا کرتے ہوئے پیشہ ورانہ صحافت اور مثبت روابط کے فروغ کے لیے اپنا کردار ادا کریں گے۔”
پاکستان پریس کلب یوکے انٹرنیشنل ایک دہائی سے زائد عرصے سے برطانیہ بھر میں پاکستانی صحافیوں کی نمائندگی کر رہا ہے اور صحافتی برادری کے لیے پیشہ ورانہ تعاون، روابط اور اجتماعی امور پر مؤثر آواز اٹھانے کا پلیٹ فارم فراہم کرتا ہے۔
