5
ڈسٹرکٹ ہیڈکوارٹر عزیز بھٹی شہید ہسپتال گجرات میں ادویات کے سٹور میں اچانک آگ بھڑک اٹھی، تاہم ریسکیو ٹیموں کی فوری کارروائی کے باعث صورتحال پر قابو پا لیا گیا۔
ابتدائی معلومات کے مطابق ہسپتال کے لیبر روم کے اوپر تیسرے فلور پر واقع ادویات کے گودام میں مبینہ طور پر شارٹ سرکٹ کے باعث آگ لگی، جس کے نتیجے میں گودام شدید دھوئیں سے بھر گیا۔
ریسکیو حکام کے مطابق اطلاع ملتے ہی ٹیم موقع پر پہنچ گئی اور فوری طور پر اندر داخل ہو کر آگ بجھانے کا عمل شروع کیا گیا۔ بروقت کارروائی کے نتیجے میں آگ کو مکمل طور پر کنٹرول کر لیا گیا۔
بعد ازاں کولنگ اور وینٹیلیشن کا عمل بھی مکمل کیا گیا جبکہ گودام میں موجود سامان کو محفوظ طور پر باہر نکال لیا گیا تاکہ دوبارہ آگ بھڑکنے کا خطرہ نہ رہے۔
حکام کے مطابق واقعے میں کسی جانی نقصان کی اطلاع نہیں ملی۔
