اسلام آباد: شہباز شریف کے خطے کے اہم ممالک کے مجوزہ دورے کو ری شیڈول کر دیا گیا ہے، جس کے تحت وہ سب سے پہلے سعودی عرب روانہ ہوں گے۔
ذرائع کے مطابق وزیراعظم اپنے دورے کے دوران بالترتیب قطر اور ترکیے کا بھی دورہ کریں گے۔ اس سفارتی مہم کا مقصد خطے کی موجودہ صورتحال اور اہم امور پر قریبی اتحادی ممالک کے ساتھ مشاورت کرنا ہے۔
اطلاعات کے مطابق وزیراعظم سعودی عرب میں محمد بن سلمان سے ملاقات کریں گے، جس میں دوطرفہ تعلقات، علاقائی صورتحال اور عالمی پیش رفت پر تبادلہ خیال کیا جائے گا۔ اس موقع پر اسلام آباد میں جاری سفارتی کوششوں پر بھی بات چیت متوقع ہے۔
وزیراعظم شہباز شریف کا آئندہ 48 گھنٹوں میں سعودی عرب کا اہم دورہ
ذرائع کا کہنا ہے کہ ملاقات میں پاکستان اور سعودی عرب کے درمیان تعلقات کو مزید مستحکم بنانے کے مختلف پہلوؤں پر غور کیا جائے گا۔ اس کے علاوہ آبنائے ہرمز کی صورتحال اور امریکا اور ایران کے درمیان ممکنہ مذاکرات کے اگلے مرحلے پر بھی تبادلہ خیال ہوگا۔
ماہرین کے مطابق یہ دورہ خطے میں سفارتی روابط کو فروغ دینے اور جاری کشیدگی کے تناظر میں اہم پیش رفت ثابت ہو سکتا ہے۔
