جہلم میں سی سی ڈی اور ڈکیتوں کے درمیان مبینہ مقابلے میں ڈلیوری بوائے کو ڈکیتی کے دوران گولی مارنے والے دو ملزمان کو زخمی حالت میں گرفتار کر لیا گیا۔
ذرائع کے مطابق جہلم کے علاقے پیراغائب میں سی سی ڈی اور ڈکیتوں کے درمیان مبینہ مقابلہ پیش آیا، جس کے نتیجے میں دو ڈکیت زخمی حالت میں گرفتار کر لیے گئے جبکہ دیگر ملزمان فرار ہونے میں کامیاب ہو گئے۔ زخمی ملزمان کو فوری طور پر ڈسٹرکٹ ہیڈ کوارٹر (ڈی ایچ کیو) ہسپتال جہلم منتقل کر دیا گیا۔
ذرائع کے مطابق ناکہ بندی کے دوران موجود اہلکاروں نے دو موٹر سائیکلوں پر سوار چار مشتبہ ملزمان کو رکنے کا اشارہ کیا، تاہم ملزمان نے رکنے کے بجائے پولیس پر فائرنگ کرتے ہوئے ناکہ توڑ کر فرار ہونے کی کوشش کی۔ تعاقب کے دوران کچھ فاصلے پر دو ملزمان ابرار علی اور عدنان امتیاز زخمی حالت میں پائے گئے جنہیں گرفتار کر لیا گیا۔
جہلم: ٹریفک قوانین کی خلاف ورزی اور پولیس سے بدتمیزی پر خاتون سمیت تین افراد گرفتار
ابتدائی معلومات کے مطابق زخمی ہونے والے ملزمان اپنے ہی ساتھیوں کی فائرنگ کی زد میں آئے۔ گرفتار ملزمان ایک ہفتہ قبل ڈلیوری بوائے کو دوران ڈکیتی فائرنگ کر کے زخمی کرنے کی واردات میں بھی ملوث تھے۔
حکام نے ذرائع کو بتایا کہ ملزمان سے مزید تفتیش جاری ہے جبکہ فرار ہونے والے ساتھیوں کی گرفتاری کے لیے چھاپے مارے جا رہے ہیں۔
