3
گھریلو تشدد سے متعلق قانون کی منظوری کے تیسرے روز راولپنڈی کے علاقے ٹیکسلا میں ایک افسوسناک واقعہ پیش آیا، جہاں ایک خاتون نے اپنے شوہر کو گولی مار کر قتل کر دیا۔
پولیس کے مطابق مقتول جواد حسین، 28 سالہ، کی ڈیڑھ سال قبل شادی ہوئی تھی اور وہ اپنی اہلیہ کے ساتھ اکثر جھگڑوں کا شکار رہتا تھا۔ خاتون لاریب نے 2 روز قبل گھریلو چپقلش کے دوران 12 بور رائفل سے فائرنگ کی اور شوہر کو ہلاک کر دیا۔
ملزمہ واقعے کے بعد فرار ہو گئی تھی لیکن ٹیکسلا پولیس نے ٹیکنیکل اور انسانی انٹیلیجنس ذرائع استعمال کرتے ہوئے اسے گرفتار کر لیا۔
پولیس کا کہنا ہے کہ ملزمہ کو ٹھوس شواہد کے ساتھ عدالت میں پیش کیا جائے گا، جبکہ مقدمے کے مدعی شبیر حسین نے بیان دیا کہ ملزمہ اکثر شوہر کے ساتھ جھگڑا کرتی اور اس کے ساتھ نہیں رہنا چاہتی تھی۔
