ہائیر ایجوکیشن کمیشن (ایچ ای سی) نے 35ویں نیشنل گیمز کے فیڈریشن اسپورٹس فیسٹیول میں پہلی بار فینسنگ کے مقابلوں میں حصہ لے کر مردوں اور خواتین دونوں کیٹیگریز میں چیمپئن شپ جیت کر غیر معمولی کارکردگی دکھائی۔
یہ مقابلے 7 تا 11 دسمبر 2025 تک این ای ڈی یونیورسٹی آف انجینئرنگ اینڈ ٹیکنالوجی کے اسپورٹس جمنازیم میں منعقد ہوئے۔ ایونٹ میں آزاد جموں و کشمیر، بلوچستان، پنجاب، سندھ، گلگت بلتستان، پولیس، نیوی، ایچ ای سی اور اسلام آباد کی ٹیموں نے حصہ لیا اور اعلیٰ مہارت، نظم و ضبط اور اسپورٹس مین اسپِرٹ کا مظاہرہ کیا۔
ایونٹ کی نگرانی سندھ فینسنگ ایسوسی ایشن کے سیکریٹری اور آرگنائزنگ کمیٹی کے سیکریٹری محمد تقی نے کی۔ ان کے قیادت میں تمام مقابلے احسن انداز میں مکمل ہوئے اور کھلاڑیوں کی کارکردگی کو حاضرین اور تکنیکی حکام نے سراہا۔ انتظامات کو بھی مثالی قرار دیا گیا۔
نیشنل گیمز: ارشد ندیم نے جیولن تھرو ایونٹ میں گولڈ میڈل جیت لیا
اختتامی تقریب میں پاکستان فینسنگ فیڈریشن کے صدر بہزاد انور، پاکستان اولمپک ایسوسی ایشن کے سیکریٹری خالد محمود، ریلوے اسپورٹس بورڈ کے صدر حمدان نذیر اور سندھ اولمپک ایسوسی ایشن کے سیکریٹری احمد علی راجپوت سمیت دیگر نمایاں شخصیات نے شرکت کی۔ مہمانِ خصوصی نے کھلاڑیوں میں میڈلز اور اسناد تقسیم کیں اور ان کے عزم و حوصلے کو سراہا۔
مردوں کے مقابلوں میں ایچ ای سی کی ٹیم نے 3 گولڈ، 2 سلور اور 1 برانز میڈل حاصل کر کے پہلی پوزیشن حاصل کی، جبکہ پنجاب نے 3 گولڈ اور 2 برانز کے ساتھ دوسرے اور بلوچستان نے 2 سلور، 3 برانز کے ساتھ تیسرے نمبر پر رہیں۔ خواتین کے مقابلوں میں ایچ ای سی کی ٹیم نے 3 گولڈ، 3 سلور اور 3 برانز میڈلز کے ساتھ چیمپئن شپ جیتی، بلوچستان نے 2 گولڈ، 2 سلور، 2 برانز اور پنجاب نے 1 گولڈ، 2 برانز کے ساتھ بالترتیب دوسری اور تیسری پوزیشن حاصل کی۔
پاکستان فینسنگ فیڈریشن کے سیکریٹری جنرل نے تمام ٹیموں کو مبارکباد دیتے ہوئے حکومتِ سندھ، پاکستان اولمپک ایسوسی ایشن، سندھ اولمپک ایسوسی ایشن، این ای ڈی یونیورسٹی، سندھ فینسنگ ایسوسی ایشن، ججز اور رضاکاروں کے تعاون کا خصوصی شکریہ ادا کیا۔
