اپوزیشن اتحاد کے اندر بڑی تبدیلی کی تیاریاں جاری ہیں اور اطلاعات کے مطابق تحریکِ تحفظِ آئین کی سربراہی محمود خان اچکزئی سے لے کر مولانا فضل الرحمان کو دینے پر سنجیدگی سے غور کیا جا رہا ہے۔
ذرائع کے مطابق محمود خان اچکزئی کی بطور اپوزیشن لیڈر نامزدگی کے بعد اپوزیشن اتحاد کے رہنماؤں کے درمیان یہ بحث جاری ہے کہ اتحاد کی قیادت ایک ایسی شخصیت کے پاس ہونی چاہیے جو سب جماعتوں کو ساتھ لے کر چل سکے۔ اسی سلسلے میں جے یو آئی کے سربراہ مولانا فضل الرحمان کا نام مضبوط امیدوار کے طور پر سامنے آیا ہے۔
بتایا گیا ہے کہ پی ٹی آئی سمیت دیگر اپوزیشن جماعتیں مولانا فضل الرحمان کی قیادت میں اتحاد بنانے اور جے یو آئی کو باضابطہ طور پر شامل کرنے کے معاملے پر مشاورت کر رہی ہیں۔ تاہم پی ٹی آئی کے چند رہنماؤں نے اس تجویز سے اختلاف بھی کیا ہے۔
ذرائع نے یہ بھی دعویٰ کیا ہے کہ اگر مذاکرات کامیاب ہوگئے تو نئے اتحاد کو ”گرینڈ اپوزیشن الائنس“ کا نام دیا جا سکتا ہے۔ اس حوالے سے فضل الرحمان سے مذاکرات جاری ہیں اور اب تک تقریباً 60 فیصد معاملات پر اتفاق ہو چکا ہے۔
مزید بتایا جا رہا ہے کہ اگلے 2 سے 3 روز میں پی ٹی آئی کا وفد مولانا فضل الرحمان سے اہم ملاقات کرے گا، جس کے بعد حتمی فیصلے سے متعلق بانی پی ٹی آئی کی منظوری لی جائے گی۔
