فیلڈ مارشل عاصم منیر نے تربت کے دورے میں کہا کہ پاک فوج بلوچستان کے عوام کے ساتھ کھڑی ہے، ترقی، گڈ گورننس اور امن کے لیے سول و عسکری اداروں کی شراکت ضروری ہے۔
راولپنڈی، فیلڈ مارشل سید عاصم منیر نے کہا ہے کہ پاک فوج بلوچستان کے عوام کی ترقی، خوشحالی اور امن کے لیے کندھے سے کندھا ملا کر کھڑی ہے۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل نے بلوچستان کے ضلع تربت کا دورہ کیا جہاں انہوں نے موجودہ سیکیورٹی صورتحال، ترقیاتی اقدامات اور سول و عسکری اداروں کے درمیان ہم آہنگی کا جائزہ لیا۔ اس موقع پر وزیراعلیٰ بلوچستان میر سرفراز بگٹی، چیف سیکرٹری اور دیگر اعلیٰ حکام بھی موجود تھے۔
دورے کے دوران فیلڈ مارشل کو خطے کی مجموعی سیکیورٹی صورتحال، خطرات کے تناظر میں کیے گئے اقدامات، فتنہ الہندوستان کے خلاف کامیاب آپریشنز اور جاری ترقیاتی منصوبوں پر تفصیلی بریفنگ دی گئی۔ انہیں بتایا گیا کہ جنوبی بلوچستان میں سماجی و اقتصادی حالات بہتر بنانے کے لیے مختلف اقدامات کیے جا رہے ہیں تاکہ عوام کو بنیادی سہولیات میسر آئیں۔
فیلڈ مارشل عاصم منیر نے وزیراعلیٰ بلوچستان اور سول انتظامیہ کے نمائندوں سے ملاقات میں گڈ گورننس، بنیادی ڈھانچے کی بہتری اور عوام دوست ترقیاتی پالیسیوں پر زور دیا۔
وزیراعظم شہباز شریف اور فیلڈ مارشل عاصم منیر کا سیلاب زدہ علاقوں کا دورہ، متاثرین کی امداد کا جائزہ
انہوں نے کہا کہ بلوچستان کے مسائل کے حل اور ترقی کے سفر میں سول و عسکری اداروں کی مشترکہ کوششیں ناگزیر ہیں، ان کا کہنا تھا کہ جنوبی بلوچستان کی سماجی و اقتصادی ترقی کے لیے پاک فوج غیر متزلزل حمایت جاری رکھے گی۔
انہوں نے جوانوں سے ملاقات بھی کی اور مشکل حالات کے باوجود ان کے حوصلے، تیاری اور قومی خودمختاری کے دفاع کے عزم کو سراہا۔ فیلڈ مارشل نے کہا کہ خطے میں امن و استحکام کے قیام میں جوانوں کا کردار قابلِ تحسین ہے۔
یاد رہے کہ تربت پہنچنے پر فیلڈ مارشل سید عاصم منیر کا استقبال کور کمانڈر بلوچستان نے کیا۔
