وفاقی وزیر امیر مقام نے سوات سیلاب میں جانیں بچانے والے محمد ہلال اور عصمت علی کو وزیر اعظم کی جانب سے 10،10 لاکھ روپے دیے۔
پشاور میں وفاقی وزیر اور مسلم لیگ (ن) خیبرپختونخوا کے صدر انجینئر امیر مقام نے سوات میں حالیہ سیلاب کے دوران اپنی مدد آپ کے تحت قیمتی جانیں بچانے والے دو بہادر نوجوانوں محمد ہلال اور عصمت علی کو 10،10 لاکھ روپے کے چیک پیش کیے۔ یہ مالی انعام وزیر اعظم محمد شہباز شریف کی ہدایت پر دیا گیا تاکہ ان کی دلیرانہ اور بروقت امدادی خدمات کو سراہا جا سکے۔
محمد ہلال اور عصمت علی نے قدرتی آفت کے دوران اپنی جان کو خطرے میں ڈال کر کئی افراد کو موت کے منہ سے نکالا اور انسانی ہمدردی کی شاندار مثال قائم کی۔
اس موقع پر امیر مقام نے کہا کہ دونوں نوجوانوں نے نہ صرف بہادری دکھائی بلکہ اتحاد اور ہمدردی کی عملی تصویر بھی پیش کی۔ انہوں نے کہا کہ حکومت ان جیسے افراد کی حوصلہ افزائی جاری رکھے گی جو مشکل گھڑی میں قوم کے شانہ بشانہ کھڑے ہوتے ہیں۔
انہوں نے دیگر تمام رضاکاروں اور امدادی کارکنوں کا بھی شکریہ ادا کیا جنہوں نے سیلاب کے دوران متاثرین کی مدد میں بھرپور کردار ادا کیا۔
رضاکاروں نے وزیر اعظم اور وفاقی وزیر کا شکریہ ادا کرتے ہوئے کہا کہ وہ آئندہ بھی ہر مشکل وقت میں قوم کی خدمت کے لیے حاضر رہیں گے۔ اس موقع پر سابق صوبائی وزیر محمد علی شاہ بھی موجود تھے۔
یاد رہے کہ سوات اور خیبرپختونخوا کے دیگر علاقوں میں حالیہ بارشوں اور کلاوڈ برسٹ کے بعد آنے والے سیلاب نے بڑے پیمانے پر تباہی مچائی تھی جس کے نتیجے میں درجنوں قیمتی جانیں ضائع ہوئیں۔
