22
کراچی، گورنر سندھ کامران ٹیسوری نے کہا ہے کہ پاکستان کا دفاع مضبوط ہاتھوں میں ہے اور فیلڈ مارشل عاصم منیر کی قیادت کو دنیا سراہ رہی ہے۔
مزارِ قائد پر حاضری کے بعد میڈیا سے گفتگو میں گورنر سندھ نے کہا کہ اللہ تعالیٰ نے ہمیں موقع دیا ہے کہ ہم معرکہ حق کے بعد اب معرکہ معیشت کی طرف بڑھ رہے ہیں۔
انہوں نے کہا کہ یہ ملک کلمے کے نام پر حاصل کیا گیا ہے اور انشاء اللہ یہ قیامت تک سلامت رہے گا، ہمارا عزم ہے کہ ہم اسی جذبے کے ساتھ ملک کی خدمت جاری رکھیں گے۔
کامران ٹیسوری کا کہنا تھا کہ پرچم کے سائے تلے ہم سب ایک ہیں، مزار قائد پر پرچم کشائی کی تقریب میں مختلف ممالک کے قونصل جنرلز نے بھی شرکت کی، اور یہ اس بات کا ثبوت ہے کہ پاکستان خوشحال مستقبل کی طرف گامزن ہے۔
گورنر سندھ نے مزید کہا کہ قائداعظم کے فرمان کے مطابق پاکستان میں اقلیتوں کو مکمل حقوق حاصل ہیں اور ہم سب ملک کی سالمیت اور ترقی کے لیے مل کر کام کر رہے ہیں۔
