راولپنڈی،پاک فوج کے شعبہ تعلقات عامہ کے مطابق چیف آف آرمی اسٹاف جنرل سید عاصم منیر نے امریکا کا سرکاری دورہ کیا جہاں انہوں نے امریکی سینٹرل کمانڈ کے سبکدوش ہونے والے کمانڈر جنرل مائیکل ای کوریلا کی ریٹائرمنٹ تقریب اور نئے کمانڈر ایڈمرل بریڈ کوپر کے چارج سنبھالنے کی تقریب میں شرکت کی۔
اس موقع پر آرمی چیف نے جنرل کوریلا کی قیادت اور پاک امریکا عسکری تعلقات کو فروغ دینے میں ان کی خدمات کو سراہا جبکہ ایڈمرل کوپر کو عہدہ سنبھالنے پر مبارکباد دیتے ہوئے مشترکہ سیکیورٹی چیلنجز سے نمٹنے کے لیے تعاون کے تسلسل پر اعتماد ظاہر کیا۔
آرمی چیف نے دورے کے دوران امریکی چیئرمین جوائنٹ چیفس آف اسٹاف جنرل ڈین کین سے بھی ملاقات کی، جس میں دوطرفہ عسکری تعاون، علاقائی سلامتی اور پیشہ ورانہ دلچسپی کے دیگر امور پر بات چیت ہوئی۔ جنرل عاصم منیر نے جنرل ڈین کین کو پاکستان کے دورے کی دعوت بھی دی۔ اس موقع پر انہوں نے مختلف دوست ممالک کے دفاعی سربراہان سے غیر رسمی ملاقاتیں بھی کیں۔
امریکا میں مقیم پاکستانی نژاد برادری کے ساتھ ایک انٹرایکٹو سیشن میں جنرل عاصم منیر نے پاکستان کے روشن مستقبل پر اعتماد رکھنے کی ضرورت پر زور دیا اور کہا کہ بیرون ملک مقیم پاکستانی سرمایہ کاری اور مثبت تشخص کے فروغ میں اہم کردار ادا کرسکتے ہیں۔ پاکستانی کمیونٹی نے اس موقع پر پاکستان کی ترقی اور خوشحالی کے لیے اپنا تعاون جاری رکھنے کا عزم دہرایا۔
یاد رہے کہ جنرل عاصم منیر کا رواں سال امریکا کا یہ دوسرا سرکاری دورہ ہے۔ اس سے قبل وہ جون میں بھی امریکی عسکری اور سیاسی قیادت سے ملاقاتوں کے لیے امریکا گئے تھے، جس دوران دونوں ممالک کے تعلقات اور خطے کی سیکیورٹی صورتحال پر تبادلہ خیال ہوا تھا۔
