اسلام آباد کی انسدادِ دہشت گردی عدالت نے پی ٹی آئی رہنما فیصل جاوید کی بریت کی درخواست مسترد کر دی، احتجاج کیس کی اگلی سماعت 31 جولائی کو ہوگی
اسلام آباد: انسدادِ دہشت گردی عدالت اسلام آباد نے پاکستان تحریکِ انصاف (پی ٹی آئی) کے رہنما سینیٹر فیصل جاوید خان کی بریت کی درخواست مسترد کر دی ہے۔ یہ فیصلہ عمران خان کی نااہلی کے خلاف فیض آباد پر ہونے والے احتجاج کے مقدمے کی سماعت کے دوران سنایا گیا۔
انسدادِ دہشت گردی عدالت کے جج طاہر عباس سپرا نے کیس کی سماعت کی، جس میں پراسیکیوشن نے دو گواہان کو عدالت میں پیش کیا۔ دورانِ سماعت پی ٹی آئی رہنماؤں عامر محمود کیانی، راشد حفیظ، جمشید مغل سمیت دیگر ملزمان عدالت میں موجود تھے، جبکہ علی امین گنڈا پور اور فیصل جاوید عدالت میں پیش نہ ہوئے۔
فیصل جاوید، حیدر بن مسعود اور راجہ ماجد کی جانب سے حاضری سے استثنیٰ کی درخواستیں جمع کرائی گئیں، جبکہ ان کے وکلاء الیاس صدیقی، سردار مصروف اور زاہد بشیر ڈار نے پیروی کی۔ جج نے ریمارکس دیے کہ گواہان کا بیان ریکارڈ کر لیتے ہیں، جرح آئندہ سماعت پر کی جا سکتی ہے۔
عدالت میں دلچسپ موڑ اس وقت آیا جب جج طاہر عباس سپرا نے عامر کیانی کو مخاطب کرتے ہوئے کہا، "آپ کورٹ سے چلے جائیں، آپ اشتہاری ہیں۔ اگر آپ نے اونچا بول دیا اور پولیس نے سن لیا تو گرفتار ہو جائیں گے۔” عدالت انہیں تین بار اشتہاری قرار دے چکی ہے۔
عدالت نے فیصل جاوید خان کی بریت کی درخواست مسترد کرتے ہوئے مقدمے کی مزید سماعت 31 جولائی تک ملتوی کر دی۔
