ڈی پی او گجرات کی سربراہی میں ڈسٹرکٹ بورڈ اجلاس، 29 مقدمات پر سائلین کو سن کر میرٹ پر فیصلے کیے گئے
گجرات، ڈسٹرکٹ پولیس آفیسر مہر محمد ریاض ناز کی زیرِ صدارت ڈسٹرکٹ اسٹینڈنگ بورڈ برائے تبدیلیٔ تفتیش کا اہم اجلاس منعقد ہوا، جس میں ضلع بھر سے موصول ہونے والے 29 مختلف مقدمات کا تفصیلی جائزہ لیا گیا۔ اجلاس کے دوران سائلین کو براہِ راست سنا گیا اور پیش کیے گئے شواہد کی روشنی میں ہر کیس پر میرٹ کو مدِنظر رکھتے ہوئے فیصلے کیے گئے۔
اجلاس کا مقصد مقدمات کی تفتیش سے متعلق شکایات یا اعتراضات کا ازسرِ نو غیر جانبدارانہ جائزہ لینا تھا تاکہ انصاف کی بروقت اور شفاف فراہمی ممکن بنائی جا سکے۔ ڈی پی او گجرات نے اس موقع پر واضح کیا کہ شہریوں کو انصاف کی فراہمی پولیس کی بنیادی ذمہ داری ہے اور کسی قسم کی غفلت یا جانبداری ناقابلِ قبول ہے۔
بورڈ میں شامل افسران اور تفتیشی ٹیموں نے ہر کیس کی نوعیت، شواہد، گواہوں کے بیانات اور مقدمے کی پیش رفت کا بغور جائزہ لیا۔ ڈی پی او نے اجلاس میں موجود تمام افسران کو ہدایت کی کہ ہر مقدمے میں میرٹ کو بنیاد بنایا جائے اور سائلین کے مسائل کے حل میں تاخیر نہ ہو۔
گجرات پولیس کا بروقت ایکشن، اغواء شدہ کم سن بچہ بحفاظت بازیاب
شہریوں نے پولیس کے اس اقدام کو سراہتے ہوئے کہا ہے کہ ایسے اجلاس شفافیت کو فروغ دیتے ہیں اور عوام کا پولیس پر اعتماد بحال کرتے ہیں۔
یاد رہے کہ گجرات پولیس کی جانب سے ایسے اسٹینڈنگ بورڈ اجلاس باقاعدگی سے منعقد کیے جا رہے ہیں تاکہ ہر مقدمے میں انصاف اور شفافیت یقینی بنائی جا سکے۔
